Тәү ҡарамаҡҡа ябай ғына күренгән, аяҡ аҫтыбыҙҙа түшәлеп ятҡан үләндәрҙең шифаһы бик ҙур. Мәҫәлән, ҡымыҙлыҡ гипертония һәм атеросклероздан, гастрит, йөрәк-ҡан тамырҙары сирҙәренән файҙалы. Йәш ҡымыҙлыҡтың тәме сөсөрәк, әскелтем татлы. Быға аскорбин, ҡуҙғалаҡ кислоталары сәбәпсе. Флавоноидтар (һабағында — 0,080%, сәскәһендә — 0,075 %), гликозидтар, дуплау матдәләре, крахмал да үҙенсәлекле тәм өҫтәй. Был файҙалы үлән күбеһенсә таулы яҡтарҙа осрай, бигерәк тә Иҙел башында ул ҙур-ҙур майҙандарҙы биләй. Ҡайһы берәүҙәр һабаҡтарынан компот, ҡайнатма эшләй, кемдер бөйөрөк, бәлеш бешерә. Бәлеш эслеге әҙерләгәндә ағып сыҡмаһын өсөн бер аҙ крахмал һалырға мөмкин. Элек эс киткәндә, дизентерия булғанда тамырын, һабағын ҡайнатып эскәндәр, тамырын оҙаҡ итеп ҡайнатып, ҡара һәм көрән буяу әҙерләгәндәр. Һеҙ ҡымыҙлыҡ йыяһығыҙмы? Унан нимәләр бешерәһегеҙ, әҙерләйһегеҙ?