Берҙәм, татыу ғаиләлә генә бәхетле тормош кисереп, намыҫлы балалар тәрбиәләп була. Уйлап ҡараһаң, һәр ғаилә - үҙе серле һандыҡ. Борай районының Таңатар ауылында йәшәгән Маликовтар тап шундай ғаиләләрҙең береһе. Улар, ысынлап та, бер-береһенә тиң булған матур пар. Маликовтарҙың уңғанлығы, булдыҡлылығы йорттарынан уҡ күренеп тора. Ваҡытында “Йәшә, тыуған ауылым” район конкурсының “Иң яҡшы шәхси йорт” номинацияһында еңеүсе булған ғаилә ул. Был хеҙмәт – уларҙың уртаҡ уңышы. Фәрис Маликов яҡшы уҡый, урта мәктәпте тамамлағандан һуң бухгалтер һөнәрен ала. Йәш белгес тыуған ауылына ҡайтып, элекке Чапаев исемендәге колхозға эшкә урынлаша. Хеҙмәт юлы ошонда ашнаҡсы булып эшләгән Лилиә исемле ҡыҙ менән осраштыра. Йәштәр 1994 йылда ғаилә ҡора. Донъяны йәмләп, бер-бер артлы балалары тыуа. Лилиә урта мәктәпте тамамлағас, Нефтекамала кондитер-ашнаҡсы һөнәренә уҡый, колхозда ашнаҡсы булып эшләй, аҙаҡ мәктәптә уҡыусыларҙы тәмле аш-һыуы менән һыйлай. Аҙаҡ балалар баҡсаһында тәрбиәсе булып эшләй. Ғаилә башлығына тормош юлында төрлө вазифаларҙы башҡарырға тура килә: бухгалтер, келәт мөдире, мәктәптә хужалыҡ мөдире... Ҡайҙа ғына эшләһә лә, етәкселәрҙең маҡтау һүҙҙәренә лайыҡ була. Маликовтарға тормош юлында күпме генә ҡаршылыҡтарҙы еңеп сығырға тура килһә лә, улар бер-береһенә ныҡлы терәк булып, мөхәббәт хистәрен һүрелтмәй, башҡаларҙы һоҡландырып йәшәй белә. Үҙҙәре бик тырыш булғанға, балалары ла ярҙамсыл, хеҙмәт һөйөүсән булып үҫә. Улдарының икеһе лә ата-әсәһе өсөн өҙөлөп тора, ялдарҙа ҡайтып, ярҙамлашырға өлгөрәләр. – Тормош иптәшемдең исеме есеменә тура килеп тора. Лилиә сәскә үҫтерергә ярата. Мин дә уны йәштән сәскәләй күреп тәрбиәләнем, – ти, йылмайып, ғаилә башлығы. – Өйләнгән саҡта балдыҙымдың әйткән һүҙҙәрен онотманым. “Һиңә, еҙнә, сәскә бүләк итәбеҙ, уны һулытмай ғына йәшәт инде”, тигәйне. Лилиәм өсөн тырышып йәшәнем, артабан да шулай йәшәргә яҙһын. Ошондай аңлашып, дуҫ-татыу йәшәгән ғаиләләргә ҡарап, һоҡланмау мөмкин түгел. Беҙ уларға һаулыҡ, йорттарына именлек теләйбеҙ. Гөлназ Хужина. Фото, сығанаҡ:https://algaburaevo.ru/news/obshchestvo/2024-05-15/m-h-bb-t-dig-n-kosh-bardyr-kanatlary-pardyr-3766620