“Башҡорт аты” халыҡ-ара башҡорт тоҡомло аттар фестивале сиктәрендә үткәрелгән “Башҡорт аты – Башҡортостан Республикаһының быуаттар буйы тарихы дауамында ышаныслы һәм тоғро дуҫ!” республика ижади эштәр конкурсы тамамланды. “Башҡорт халҡы тормошонда ат йылдар дауамында ышаныслы һәм тоғро дуҫ булып тора. Тап шуға күрә күп әҫәрҙәрҙә, эпостарҙа төп геройҙар булып ат образы тора. Беҙҙең һуғышсан ата-бабаларыбыҙ – “Төньяҡ амурҙары” һәм 112-се Башҡорт кавалерия дивизияһы атлылары данлы һуғыш юлын үтте”, -тине Радий Хәбиров Баймаҡ районында үткән тәүге “Башҡорт аты” фестивалендә лә. Баһалама ағзалары булып Башҡортостан Мәғариф һәм фән, Мәҙәниәт министрлыҡтарының һәм “Башҡорт аты” башҡорт тоҡомло аттарын өйрәнеү буйынса фәнни- тикшеренеү институтының юғары квалификациялы белгестәре сығыш яһаны. Конкурсҡа муниципаль этапта еңгән эштәр ҡаралды, бөтәһе төрлө йүнәлештә 900-гә яҡын эш тәҡдим ителгән. Бөтә эштәр йәш төркөмдәренә һәм номинацияларға бүленеп баһалана. Конкурста еңеүселәр быйыл Баймаҡ районы Граф күле янында үтәсәк “Башҡорт аты” халыҡ-ара башҡорт тоҡомло аттар фестивалендә дипломдар һәм иҫтәлекле бүләктәр менән бүләкләнәсәк. Призлы урындарҙы алған иң яҡшы эштәр халыҡ-ара фестиваль күргәҙмәһендә ҡуйыласаҡ. Фото: асыҡ сығанаҡтан