Һауынсы апайҙар эштән ҡайтҡанда китап алырға инә торғайны

Бүздәк районының Әмир һәм Ҡаран ауылдары китапханасыһы Зөһрә Асҡарова маҡтауға лайыҡлы һөнәр эйәләренең береһе. Алты балалы ҙур ғаиләлә тыуып үҫкән ул. Ағай-апайҙарына ҡарап уҡырға бик иртә өйрәнә. -Беҙҙең ғаиләлә киске ваҡыт дәрес әҙерәүҙәр менән үтә ине. Шуға мин дә мәктәпкә барғансы уҡ уҡырға өйрәнеп, “Әлифба” китабын бер ҡат уҡып сыҡҡайным. Мәктәпкә барғас, беренсе уҡытыусым минең шыма уҡыуыма инанғас, китапхананан бер китап алып килде. Шулай итеп минең мәктәп китапханаһы менән дуҫлығым башланды. Өсөнсө класта уҡыған сағымда ауыл китапханаһына киттем. Уның ауыр ишеген асып ҡурҡа-ҡурҡа ғына барып кергәнем әле лә хәтерҙә. Ә инде китапаханасы апайҙың мине ҡәҙерле кешеһе һымаҡ йылмайып ҡаршы алыуын күргәс, күңелем күтәрелеп китте. Уның ниндәй кейемдә булыуы ла әле лә күҙ алдында. Шулай итеп китаптар менән дуҫлығым нығынғандан-нығынды. Ике китап алып ҡайтһам, уны ҡайтыу менән уҡып сыға инем. Шул тиклем ныҡ китап уҡырға яраттым, кластан тыш бирелгән китаптарҙы ла береһен дә ҡалдырмай инем. Минең йәшлегем шул тиклем матур ваҡытҡа тура килде, ул осорҙа халыҡ бик ныҡ китап ярата ине, ҡулдан-ҡулға йөрөтөп өлкәндәр ҙә китап уҡыны, - тип һөйләне Зөһрә Тимерйән ҡыҙы. Бәләкәйҙән китапханасы һөнәренә ғашиҡ ҡыҙ 10 -сы класты тамамлағас, әхирәте менән Китапхана техникумына юллана. Аҙаҡ юғары белем алыуға ла өлгәшә. Тәүҙә тыуған төйәгендә Комсомол секретаре булып эшләй. Йәштәр менән бергәләп эшләгән дәртле ул йылдарҙы һағынып хәтергә төшөрә әңгәмәсебеҙ. Әмир ауылына килен булып төшкәс, балалар баҡсаһында ла хеҙмәт итергә тура килә. Ә инде оҙаҡ йылдар маҡтаулы хеҙмәт иткән Әмир ауыл китапханасыһы хаҡлы ялға сыҡҡас, был эшкә Зөһрә Асҡарованы саҡыралар. Шул ваҡыттан алып 33 йыл ваҡыты Әмир китапханаһында. Был йылдар эсендә ауыл халҡы өсөн әллә күпме матур кисәләр ойошторола, уларҙың сценарийҙарын үҙе яҙа, үҙе алып бара әңгәмәсем. Бынан тыш ауыл театр коллективының сәхнәһенән дә төшмәй. Әле балалар өсөн төрлө ҡул эштәре түңәрәктәре ойоштороп та йәш быуынды йәлеп итә. Шулай уҡ китап уҡыусылары ла әле аҙ түгел. -Элек һауынсы булып эшләгән апайҙар, киске һауымдан ҡайтышлай китапханаға кереп китап ала торғайнылар. Улар хәҙер оло йәштәләр, шулай ҙа китап уҡыуҙарын ташламайҙар. Кемдәр сәләмәтлектәре арҡаһында килә алмай, уларҙың өйҙәренә илтеп бирәм. Бик рәхмәтле булып, шатланып ҡалалар, - тип һөйләне конкурсантыбыҙ. 33 йыл эсендә Зөһрә Асҡарова ҡулынан әллә күпме китап үткән... Уның тырыш хеҙмәтен төрлө кимәлдәге маҡтау ҡағыҙҙары биҙәй. Фото: Зөһрә Асҡарованың шәхси архивынан.