Бөгөн Башҡортостан Башлығы Радий Хәбиров республика йортонда сираттағы "Инвестиция сәғәте" үткәрҙе. Унда иҡтисадтың һәм социаль өлкәнең төрлө тармаҡтарында яңы проекттар ҡаралды. Мәҫәлән, «ЛУКОЙЛ-Уралнефтепродукт» компанияһының генераль директоры Айҙар Әбүзәров төбәктә яғыулыҡ ҡойоу станцияларының селтәрен үҫтереү һәм юл буйындағы хеҙмәттәр спектрын киңәйтеү буйынса бер нисә башланғыс менән таныштырҙы. Һүҙ яңы автозаправкалау станцияларын булдырыу тураһында бара, шул иҫәптән Өфө территорияһында ла. Күп функциялы комплекстарҙы төҙөүгә һалынған инвестицияларҙың дөйөм күләме — 957,8 миллион һум. Ә автозаправкалау станциялары территорияһында юл буйындағы хеҙмәтләндереү объекттары 60-ҡа яҡын яңы эш урыны булдырырға мөмкинлек бирәсәк. Фекер алышыу һөҙөмтәһендә проекттар өҫтөнлөклө статус алды. Инвесторға шулай уҡ автозаправкалау станциялары өсөн ер участкаларын теркәүҙә ярҙам күрһәтеләсәк. *** Эшҡыуар Александр Павлов Туймазы районында “САВА” маркаһы аҫтында етештерелгән ит продукцияһын етештереүҙе яңыртыу планы тураһында һөйләне. Компания 1998 йылда асыла. Тәүлегенә 100 тоннаға тиклем ит һәм колбаса изделиелары етештерә — бөтәһе 200-ҙән ашыу төр тауар сығарыла. Рәсәйҙең төрлө төбәктәренә, шул иҫәптән Свердловск һәм Төмән өлкәләренә, Приморье крайына, Татарстанға һәм Ҡырымға оҙатыла. Етештереү күләмен тағы ла арттырыу һәм продукция ассортиментын киңәйтеү маҡсатында предприятие 2023 йылда яңы ҡорамалдар һатып ала башлай. Технологик комплексты модернизациялауҙы 2024 йылда тамамлау планлаштырыла. Инвестицияларҙың дөйөм күләме яҡынса 130 миллион һум тәшкил итәсәк. Шул уҡ ваҡытта 80 яңы эш урыны булдырыласаҡ. Ярҙам сараһы булараҡ проект өҫтөнлөклө статус алды. Инвесторға һатып алынған ҡорамалдарға киткән сығымдарҙың бер өлөшө лә ҡайтарыласаҡ. *** Инвестиция комитеты ултырышында шулай уҡ Октябрьскийҙа заманса офтальмологик үҙәк булдырыу проекты ҡаралды. Һүҙ Октябрьский ҡан тамырҙары үҙәге 2020 йылдан республиканың көнбайыш райондарында йәшәүселәргә күрһәткән медицина хеҙмәттәре даирәһен тағы ла киңәйтеү хаҡында бара. Хәтерегеҙгә төшөрәбеҙ, ул 2019 йылдың майында "Инвестиция сәғәте"ндә ҡаралғандан һуң дәүләт ярҙамы арҡаһында 1-се ҡала дауаханаһы биләмәһендә булдырылған. Октябрьский ҡан тамырҙары үҙәгенең генераль директоры Карапет Топалян әйтеүенсә, офтальмологик комплексты 2024 йылда шулай уҡ 1-се ҡала дауаханаһы базаһында булдырыу планлаштырыла. Проектҡа инвестициялар күләме 200 миллион һум тәшкил итә. Үҙәк эшләй башлағандан һуң йылына 3 меңгә тиклем ирекле операциялар башҡарасаҡ. Был быға тиклем күрше райондарға дауаланырға йөрөгән Башҡортостандың көнбайыш райондарында йәшәүселәргә медицина ярҙамы күрһәтеү мөмкинлеген арттырырға мөмкинлек бирәсәк. Фекер алышыу йомғаҡтары буйынса Инвестиция комитеты тәҡдим ителгән проектты хупланы. Уны тормошҡа ашырыу өсөн дауахана биләмәһендә участканы тәьмин итеүҙә ярҙам күрһәтеләсәк. Республика Башлығы Октябрьский ҡан тамырҙары үҙәгенең эшен юғары баһаланы. – Тормошҡа ашырылған проект өсөн рәхмәт. Һеҙ күп кешенең ғүмерен һәм һаулығын ҡотҡараһығыҙ. Шулай уҡ булдырылған учреждениелар нигеҙендә халҡыбыҙҙы диагностикалау һәм дауалау сифатын күтәреү өсөн юғары квалификациялы белгестәр әҙерләү мөһим, — тине Радий Хәбиров. *** "Газстройсервис" компанияһы директоры урынбаҫары Наталья Маврина Благовещен ҡалаһында автомобиль газ тултырыусы компрессор станцияһы (CNG яғыулыҡ ҡойоу станцияһы) төҙөү проекты тураһында һөйләне. Инвестор бизнес-план төҙөп, объектты урынлаштырыу өсөн майҙансыҡ һайлап алған да инде. Төҙөлөшкә 50 миллион һум аҡса бүленәсәк. Яңы яғыулыҡ ҡойоу станцияһы урындағы халыҡтың, предприятиеларҙың һәм ойошмаларҙың ҡыҫылған тәбиғи газ менән транспорт сараларына яғыулыҡ ҡойоуҙы тәьмин итәсәк. Фекер алышыу һөҙөмтәһендә инвестиция проекты һалым льготалары биреү менән өҫтөнлөклө статус ала. Шулай уҡ Благовещен хакимиәте ер участкаһын теркәүҙә ярҙам күрһәтә. *** «Трехозерье» идарасы компанияһы туризм өлкәһендә проектты тормошҡа ашырырға — Өфөнөң Калинин районында һыу һаҡлағыс янында ял итеү үҙәге төҙөргә ниәтләй. Идарасы компанияның генераль директоры Гөлнара Латыпова билдәләүенсә, "Республика үҫеш корпорацияһы" ярҙамы менән объекттың урынын координациялау буйынса эштәр алып барыла ла инде. Яңы туристик объектҡа 15 модулле фатир, конференц-зал, ресторан комплексы һәм кафе, ванналар, ике пляж, балалар майҙансығы, барбекю зонаһы һәм туристик ҡорамалдар прокаты инәсәк. Ял үҙәген булдырыуға бөтәһе 75,3 миллион һум бүленәсәк. Был 29 яңы эш урыны булдырырға ярҙам итәсәк. Ярҙам сараһы булараҡ Инвестиция комитеты проектҡа өҫтөнлөклө статус бирә. Шулай уҡ Өфө хакимиәте инвесторға ер участкаһын теркәүҙә ярҙам күрһәтәсәк. Фото: Башҡортостан Хөкүмәте сайтынан алынды.