Илебеҙ ошондай ғаиләләргә таяна

Эйе, барыһы ла ғаиләнән башлана. Мөхәббәт тә, изгелек тә, мәрхәмәтлелек тә, кешелеклелек тә, тәрбиәлелек тә, рухлы, иманлы, уҡымышлы булыу ҙа... Ә иһә, быларҙың барыһын да йола буйынса атай-әсәй нигеҙенән алып, хәҙер инде үҙҙәре ҡорған донъяла балаларына ошо уҡ тәрбиә биргән йәш ғаиләләр беҙҙә, әлбиттә, күп. Ошондай ғаиләләрҙең береһе, республикабыҙҙа оҫта тип даны сыҡҡан конструктор-модельер Гөлфиә һәм Тойота-центр белгесе Нариман Ниғмәтовтар ҙа халҡыбыҙ тарихында үҙҙәренең яҡты эҙҙәрен ҡалдырыусылар. – Гөлфиә, йәш Ниғмәтовтар ғаиләһенең барлыҡҡа килеү тарихын һөйләп үтһәң ине. – Беҙ бала саҡтан танышбыҙ. Сөнки икебеҙ ҙә Әбйәлил районының Буранғол ауылынан. Һәм хатта бер урамдан, дүрт өй аша йәшәнек. Ул минән бер класҡа өлкән уҡыны. Шулай ҙа беҙ мәктәпкә гел бергә йөрөнөк, игеҙәгем Әлфиә менән өсәүләп. Аҙаҡ клубҡа, киске уйынға сыҡҡанда ла бергә йөрөй торғайныҡ. Дуҫ булдыҡ. Мәктәпте бөткәс, ул армияға барып килгәс, беҙ егет менән ҡыҙ булараҡ дуҫлаша башланыҡ. Дүрт йыл дуҫлашып йөрөгәндән һуң 2011 йылда өйләнештек. Әлеге ваҡытта Рәсүл һәм Искәндәр исемле малайҙар үҫтерәбеҙ. Йөрөгән ваҡытта ул хәтлем аңлап етмәһәм дә, хәҙер кейәүгә сыҡҡас, өлкәнәйгәс аңлайым үҙемдең тыуған ауылыма, әсәйемә яҡын ергә кейәүгә сығыуымдың бәхет икәнен. Бала саҡтан үҙем белгән ғаиләгә, үҙем белгән егеткә кейәүгә сыҡтым бит инде, ул да, шулай уҡ, минең турала бөтә нәмәне лә белә. Ә иһә туйыбыҙҙан һуң минең бирнәмде, һандығымды оҙатҡанда, иремдең йортона килен булып төшкәндә ныҡ итеп ямғыр яуҙы. Ҡәйнәм һәм оло инәйҙәр быны ғаиләбеҙҙең бәрәкәтле, бәхетле булыуына юраны. Ысынлап та, ғаиләбеҙҙең нигеҙе ҡотло, Аллаға шөкөр! – Замана башҡорт ғаиләһе ниндәй ул? Бөгөнгө көндә үҙ халҡыңдың йөҙөн лайыҡлы күрһәтеү өсөн ниндәй булырға кәрәк? – Беренсенән, беҙ барыбыҙ ҙа эскенән тыйылырға тейешбеҙ. Йөрәк әрней егеттәребеҙ, ауыл халҡы эскегә батыуын ҡарап. Был фажиғә булмаһа беҙҙең күп ғаиләләребеҙ ҙә тарҡалмаҫ ине. Икенсенән, үҫеш өсөн, уҡырға, белемебеҙҙе камиллаштырырға тейешбеҙ. Һәм, өсөнсөнән, балаларыңды үҙ телеңә һөйөү менән рухлы итеп үҫтерергә кәрәк. Һәм, беҙ ғаиләбеҙ менән, ошо әйтеп үткәндәрҙе тотабыҙ. Айыҡ һәм сәләмәт тормош алып барабыҙ, уҡырға, белемебеҙҙе камиллаштырырға тырышабыҙ һәм балларыбыҙҙы ла рухлы итеп үҫтереп киләбеҙ. Улар әлеге ваҡытта башҡорт гимназияһында уҡыйҙар. Икеһе лә һәйбәт уҡыйҙар, уҡыу оҡшай. Әйткәндәй, хәҙер бит инде, беҙҙең халыҡ яман өйрәнеп китте, һүҙ һайын рус һүҙҙәрен ҡыҫтырып һөйләргә. Ә беҙ был һүҙҙәрҙән ҡотолоу өсөн өйҙә балалар менән уйын уйнайбыҙ. Шулай итеп, балаларға ғына түгел үҙебеҙгә лә, башҡортса дөрөҫ һөйләшеү өсөн уңайлы һәм файҙалы был уйын. Аллаға шөкөр, тап-таҙа башҡортса һөйләшәләр, телдәрен шымартып шиғырҙар ятлайҙар. Өлкәне “Тамыр” студияһына һәм гремплингҡа йөрөй, бәләкәйе “Тел биҫтәһе” тигән проектта ҡатнашты һәм “Өфө” футбол клубына йөрөй. Шулай итеп балаларҙы әхлаҡи яҡтан ғына түгел, тәндәренең дә сәләмәт булып үҫеүен мөһим һанайбыҙ. – Үҙегеҙ атай-әсәйҙәрегеҙҙән, ҡайны-ҡәйнәләрегеҙҙән ниндәй тәрбиә, аҡыл алдығыҙ, балаларығыҙҙы ниндәй итеп үҫтерәһегеҙ, ниндәй булырға өйрәтәһегеҙ? – Мин үҫкән ғаиләлә, нимә эшләргә булһаҡ та, әсәй, атайығыҙҙан һорағыҙ, атайығыҙ нимә тиер, тип әйтә ине. Хәҙер мин дә малайҙарҙы шулай үҫтерәм. Күбеһенсә аталарынан рөхсәт һоратам. Атай кешенең дәрәжәһен, абруйын күтәрә был тип уйлайым. Атайҙарынан кәңәш, рөхсәт һорап үҫкән малайҙар киләсәктә үҙҙәрен дә ошолай ирҙәрсә тоторҙарына ышанам. Ә иһә һәр атай-әсәй кеүек үк, беҙ ҙә улдарыбыҙға тик изгелек-яҡшылыҡтар ғына теләп, ҙур өмөттәр бағлайбыҙ. Уларҙың Башҡортостаныбыҙға кәрәкле ир-егеттәр булып үҫеүен теләйбеҙ. Иң мөһиме, баланы баштан тәрбиәләйҙәр, шуға ла, әле ҡулыбыҙҙан килгән тиклем, нимә яҡшы, нимә насар тигәндәй, тәрбиә бирергә тырышабыҙ. – Быйылғы “Ғаилә йылы”нан нимә көтәһегеҙ? – Быйылғы йылды “Ғаилә йылы” тип атауҙары бик оҡшай, бик кәрәк, бик мөһим ваҡиға тип уйлайым. Беренсенән, барыһы ла ғаиләнән башлана, йәғни, тарихҡа, мәҙәниәткә, үҙ телебеҙгә һөйөү. Шуға ла, быйылғы йылда бик күп ғаиләләр барлыҡҡа килһен, булғандары тарҡалмаһындар, күберәк бәпестәр тыуһын тип уйлайым. Республикала инде ғаилә мөнәсәбәттәрен нығытыуға, телебеҙгә, мәҙәниәтебеҙгә, ғөрөф-ғәҙәттәребеҙгә һөйөү уятырлыҡ матур проекттар көтөп ҡалабыҙ. Үҙебеҙ иһә, мөмкинселек булған тиклем бындай проекттарҙа ҡатнашырға ла тырышабыҙ. Ныҡлы ғаилә – ил терәге, тиҙәр халҡыбыҙҙа. Балаларына матур тәрбиә биреп, аң-белемгә, яҡшылыҡҡа, яҡтылыҡҡа ынтылып йәшәүсе Ниғмәтовтар ғаиләһе быға асыҡ миҫал. Илебеҙ тап ошонай ғаиләләргә таянып ҡеүәтле һәм берҙәм. Фотолар ғаилә архивынан.