Վրաստանի խորհրդարանն ընդունել է «Օտարերկրյա ազդեցության թափանցիկության մասին» վիճահարույց օրինագիծը

Վրաստանի խորհրդարանը երրորդ ընթերցմամբ և վերջնականապես ընդունել է «Օտարերկրյա ազդեցության թափանցիկության մասին» վիճահարույց օրինագիծը, տեղեկանցում է Sputnik․ge-ն։

Ըստ լրատվականի՝ նախագծին կողմ է քվեարկել 84, դեմ՝ 30 պատգամավոր։

Օրինագիծը պարտավորեցնում է օտարերկրյա ֆինանսավորվող հասարակական կազմակերպություններին և լրատվամիջոցներին գրանցվել հատուկ գրանցամատյանում և լրացնել տարեկան հայտարարագիր։

Նշենք, որ երկրի նախագահ Սալոմե Զուրաբիշվիլին արդեն հայտարարել է, որ վետո է դնելու օրինագծի վրա, սակայն խորհրդարանը հնարավորություն ունի այն չեղարկել։

Օրինագծի քննարկումը տեղի է ունեցել իշխող «Վրացական երազանք-Ժողովրդավարական Վրաստան» կուսակցության պատգամավորների և օրենքին դեմ հանդես եկող ընդդիմադիր կուսակցությունների բողոքի ցույցերի և ծեծկռտուքի ֆոնին։ Թբիլիսիի կենտրոնում՝ Վրաստանի խորհրդարանի մոտ, կրկին հավաքվել են ցուցարարներ՝ փակելով Ռուսթավելի պողոտան, ինչպես նաև շենքի կողային մուտքը։

Ընդդիմադիրները, հասարակական կազմակերպությունների ներկայացուցիչները և քաղաքացիական ակտիվիստները, որոնք դեմ են օրինագծի ընդունմանը, պնդում են, որ այն դասում է Վրաստանի բարեկամներին և թշնամիներին, պիտակավորում է նրան և խոչընդոտում է երկրի ինտեգրմանը ԵՄ-ին։

Ապրիլի 17-ին Վրաստանի խորհրդարանն առաջին ընթերցմամբ հավանություն էր տվել«Օտարերկրյա ազդեցության թափանցիկության մասին» օրինագծին, որին դեմ էին արտահայտվել երկրի նախագահ Սալոմե Զուրաբիշվիլին, ընդդիմությունը և արևմտյան դիվանագետները՝ այն համարելով խոչընդոտ Եվրամիության ինտեգրման գործընթացին։ Ապրիլի 15-ից ընդդիմությունը և քաղաքացիական ակտիվիստները Թբիլիսիում ցույցեր են անցկացնում օրինագծի դեմ։

Օրենքը պարտավորեցնում է օտարերկրյա ֆինանսավորվող հասարակական կազմակերպություններին և լրատվամիջոցներին գրանցվել հատուկ գրանցամատյանում և լրացնել տարեկան հայտարարագրեր։ Նախագիծը երեք ընթերցմամբ ընդունելուց հետո միայն կուղարկվի Վրաստանի նախագահին՝ ստորագրման։ Ապրիլի 15-ին Վրաստանի խորհրդարանի իրավական հանձնաժողովը պաշտպանել էր օրինագիծը։

Մայիսի 1-ին Վրաստանի խորհրդարանը լիագումար նիստում երկրորդ ընթերցմամբ պաշտպանել էր «Օտարերկրյա ազդեցության թափանցիկության մասին» օրինագիծը, որի քննարկմանը զուգահեռ՝ տեղի էին ունեցել ակցիաներ, որոնց ընթացքում Վրաստանի ՆԳՆ հատուկջոկատայիններն արցունքաբեր գազ էին կիրառել։

Նորություններին հետևեք մեր կայքում (https://armeniatoday.news/hy), ինչպես նաև Telegram-ում (https://t.me/armtodayarm) և YouTube-ում (https://www.youtube.com/channel/UCzt73kS8-2XS9q5cLubs3ww)