Республикала алданған өлөшсөләр һаны кәмегән

14 майҙа Өфөлә республика Башлығы Радий Хәбиров өлөшләтә төҙөлөштә ҡатнашыусыларҙың боҙолған хоҡуҡтарын тергеҙеүҙә әүҙем ҡатнашҡан министрлыҡ һәм ведомство, предприятие һәм ойошма вәкилдәренә Башҡортостандың дәүләт наградаларын тапшырҙы. 52 кешенең ҡаҙаныштары маҡтаулы исемдәр, почет грамоталары һәм рәхмәт хаттары менән билдәләнде. Башҡортостан Башлығы алданған өлөшсөләрҙең проблемаларын хәл итеүҙә ҡатнашҡандарға рәхмәт һүҙҙәрен еткерҙе. – 2017 – 2023 йылдарҙа республикала 15 мең алданған өлөшсө һаналған. Уларҙың күбеһе буласаҡ торлаҡҡа һуңғы аҡсаларын һалған һәм ҡайһы бер төҙөүселәрҙең намыҫһыҙлығы һөҙөмтәһендә бик ҡатмарлы хәлгә эләккән, – тип билдәләне Радий Хәбиров. Өлөшләтә төҙөлөштә ҡатнашыусыларҙың хоҡуҡтары Ил Президенты Владимир Путин ҡушыуы буйынса тергеҙелгән. Был бурыс 2023 йылдың аҙағына тиклем уңышлы үтәлде, тип билдәләне төбәк етәксеһе. – Башҡортостан алданған өлөшсөләр һаны буйынса Рәсәйҙә тәүге биш төбәк исемлегендә ине. Һеҙҙең ярҙамығыҙ менән был эште атҡарып сыҡтыҡ. Был йәһәттән беҙгә Федераль биләмәләрҙе үҫтереү фонды ҙур ярҙам күрһәтте, – тине төбәк етәксеһе. Шуны билдәләргә кәрәк: республикала бөтәһе 98 проблемалы йорт төҙөлөп бөткән, шуларҙың 27-һе – Биләмәләрҙе үҫтереү фонды ҡатнашлығында. Шулай уҡ уның ярҙамы менән 2020 йылдан алып 4300-ҙән ашыу өлөшсө компенсация түләүҙәре алған. – Беҙ йорттарҙың байтаҡ өлөшөн төҙөп бөттөк, кешеләр фатир асҡыстарын алды, – тине Радий Хәбиров. – Ҡайһы бер объекттар буйынса ҡатмарлы юридик механизмдар эшләнек, коммерция төҙөүселәребеҙҙе лә йәлеп иттек. Дәүләт органдары, йәмәғәт институттары һәм төҙөүселәрҙең берлектәге эше арҡаһында беҙ күп мәсьәләләрҙе хәл иттек. Республика Башлығы шулай уҡ хоҡуҡ һаҡлау органдарына намыҫһыҙ төҙөүселәрҙе яуаплылыҡҡа тарттырыу буйынса оператив саралар күреүҙәре өсөн рәхмәт белдерҙе. – Был тема буйынса конструктив эшләгән йәмәғәт институттарыбыҙға ла рәхмәтлемен. Иң мөһиме – республикала алданған өлөшсөләр булмаһын, төҙөлөп бөткән йорттар һаны артһын. Был – беҙҙең киләсәккә бурысыбыҙ, – тип йомғаҡ яһаны Радий Хәбиров. Фото: glavarb.ru