Ғәйеп булыр алдынан социаль селтәрҙәрен бөтөргән

Башҡортостанда 20 йәшлек студент ҡыҙ юғалған. Карина Кашапова яҡындары менән һуңғы тапҡыр бәйләнешкә 8 майҙа сыҡҡан. Ул һәр ваҡыт тыныс һәм баҫалҡы булған, ҡайһы саҡта күп нәмәһен йәшергән. Шуға күрә уның ҡапыл юҡ булыуы таныштарын бик ғәжәпләндерә. Был хәлде “КП-Өфө” баҫмаһы өйрәнгән. Асыҡланыуынса, Карина апрель аҙағында илдең икенсе осона – Владивостокка билеттар алған. Унда ҡыҙ Новосибирск аша барырға йыйынған. Тик үҙенең сығып китергә планлаштырғанын бер кемгә лә әйтмәгән. – 2 май көндө ул университетта сирләп киттем тигән, ә 5 майҙа Владивостокка юлланған. 8 майға тиклем беҙҙән Өфөлә түгел икәнлеген йәшерҙе. Тап ошо көндө бәйләнешкә сығыуҙан туҡтаны, – тип һөйләгән уның апаһы Алина. Әсәһе лә ҡыҙы менән бәйләнешкә сығып ҡарай. Тик Карина трубка алмай, ни бары бер нисә көн элек кенә “Әсәкәйем, ғәфү ит, шунда уҡ яуап бирә алмайым” тип СМС-хәбәр ебәргән. Шуға күрә тәүге көндәрҙә ғаиләһе уның бәйләнешкә сыҡмауына бик иғтибар итмәй. Әммә 10 майҙа ла, 11 майҙа ла ул шылтыратмай. 12 майҙа иһә ҡыҙҙың яҡындары ныҡлы борсола башлай. Шунда уҡ кешеләрҙе эҙләү менән шөғөлләнгән “Лиза Алерт” эҙәрмәндәренә ғариза ебәрәләр һәм ярҙам һорайҙар. Кисә Каринаның әсәһе Өфөгә килә һәм ҡыҙының бер нисә көн фатирында булмауын асыҡлай. – Ул буш һәм таҙа фатирға килде. Дәфтәрҙәре лә, әйберҙәре лә юҡ ине. Ни бары сит ил паспорт, студент билеты ғына ҡалған, ә зачет кенәгәһен алған, – ти Алина. Шуныһы аптырата, ҡыҙ юғалыр алдынан социаль селтәрҙәрҙә эҙҙәрен юйырға тырыша: бөтә аккаунттарын һәм электрон почтаһын юҡҡа сығара. Апаһы әйтеүенсә, һеңлеһе телдәр өйрәнгән, өйҙә ултырырға, сериалдар ҡарарға яратҡан. Әсәһе менән бик йылы мөнәсәбәттә булған. – Кистәрен бер ҡайҙа ла йөрөмәй ине. Уҡый, тартмай, эсмәй, дискотекаларҙы яратмай. Хатта сығарылыш кисәһен байрам итергә лә барманы. Шуға күрә ул ҡапыл ғына йыраҡҡа сығып китә торған кеше түгел, – тигән Алина. Низағтарҙы ла яратмаған ҡыҙ. Ул шым һәм хафаланыусан, сит кешеләрҙән ҡасҡан. Ә бына Кореяла йәшәгән дуҫтары менән йыш аралашҡан. Әле асыҡланыуынса, ҡыҙҙың эҙҙәре тап Владивостокта өҙөлә. Уның сит илгә сығыу-сыҡмауын тикшерәләр, әммә ғаилә быға ышанмай: ул бит сит ил паспортын өйҙә ҡалдырып киткән. Уның билдәләре: буйы 160 сантиметр, ҡаҡса кәүҙәле, ҡара сәсле, һоро күҙле. Юғалған көндө Карина нимә кейгәне, билдәһеҙ. Әлеге ваҡытта полиция һәм ирекмәндәр Каринаны эҙләй. Уның ҡайҙалығы тураһында белһәгеҙ 8-800-700-54-52 телефонына шылтыратыу һорала. Фото: "Лиза Алерт".