Йәшәү хаҡына!

Баш ҡалабыҙ Өфөнөң "Башҡортостан" дәүләт концерт залында Бөйөк Еңеүҙең 79 йыллығына арналған концертта Фәйзи Ғәскәров исемендәге Башҡорт дәүләт академия халыҡ бейеүҙәре ансамбле "Йәшәү хаҡына" тигән хореографик композиция менән таныштырҙы. Ул махсус хәрби операцияға арналған. ....Яҡындарын, һөйгәндәрен күҙ алдына килтереп, уларҙың имен-һау ҡайтыуы тураһында теләктәрен ҡушып, ҡатын-ҡыҙҙар маскировка селтәрҙәре үрә... Шомло музыка яңғырай, яугирҙәр сәхнәгә сыға - улар һөжүмгә ташлана... Аҙаҡҡы сәхнә йәшәүгә, еңеүгә ҡаҡшамаҫ ышаныс менән һуғарылған: ҡыҙ үҙенең һөйгәнен көтөп ала, тормошто дауам итер йәш ғаилә барлыҡҡа килә. Бейеүҙең авторы, ҡуйыусыһы - ансамблдең директоры Нәзир Баййегетов, уға Мәскәүҙән талантлы бейеү ҡуйыусы Константин Диденко булышлыҡ иткән. Композиторы - ғәскәровсылар оркестры етәксеһе Рәил Мөрсәлимов. Үҙенсәлекле хореографик композицияның барлыҡҡа килеү тарихын һөйләүен үтенеп, Нәзир Баййегетовҡа мөрәжәғәт иттек. – Үткән йыл 9 Май байрамында хәйриә концерты ҡуйып, йыйылған аҡсаға яҡташ яугирҙәргә машина һатып алдыҡ. Сентябрь айында гуманитар конвойға ҡушылып, уны М. Шайморатов исемендәге батальон яугирҙәренә алып барып тапшырыуҙа ҡатнаштым. Аҙаҡ казармала егеттәр янында йәшәп алыу, улар менән тығыҙ аралашыу хәрби мөхитте тойорға ярҙам итте, ошо саҡта бейеү һалыу тураһында уйлана башланым. Күп яҡташтарҙың ифрат ҡыйыу аҙымға - үҙ теләге менән махсус хәрби операцияға барыу тарихтарын тыңланым. Дуҫымдың һөйләгәне күңелгә уйылды: уға кәләшенә был хаҡта әйтергә йыр ярҙам итә, уның һүҙҙәре ике йөрәккә бер-береһен аңларға булыша. Шул саҡта буласаҡ бейеүҙең көй мотивтары ла күңелгә килде. Өфөгә ҡайтҡас та тема тынғы бирмәне. Бейеүҙә халҡыбыҙҙың яугирҙәргә ярҙамын, уларҙың әйләнеп ҡайтыуын түҙемһеҙләнеп көтөүен дә күрһәтке килде. Күңелдә ҡайнаған тойғоларҙы ҡушып, либретто яҙҙым. Композиторыбыҙ Рәил Мөрсәлимовҡа ла алдағы тарихты һөйләнем, ниндәй көй мотивы кәрәклеге буйынса фекер алыштыҡ. Музыкаль композиция әҙер булғас, бейеүгә тотондоҡ. Беҙ халыҡ бейеүҙәре ансамбле, ә яңы хореографик композиция заманса, йәштәргә лә аңлайышлы булырға тейеш, тигән маҡсаттан сығып эш иттек. Шуға ярҙамға Мәскәүҙән дуҫым, талантлы хореограф Константин Диденконы саҡырҙым. Композициялағы хәрби хәрәкәттәр ҙә профессиональ яугирҙәр менән кәңәшләшеп, уларҙың өйрәтеүе буйынса индерелде. Рәсәйҙәге башҡа дәүләт ансамблдәре әлегә ундай композициялар ижад иткәне юҡ, шуға ла махсус хәрби операция темаһына мөрәжәғәт иткән беренсе бейеү коллективы булыуыбыҙ ғорурландыра. Бейеүҙең премьераһын тамашасылар ныҡ яратып, күңелдәренән үткәреп ҡабул итте, концерттан һуң матур-матур фекерҙәрен, теләктәрен еткерҙе, - тип уртаҡлашты ул. "Йәшәү хаҡына" - ул ябай бейеү генә түгел. Ул тотош ил халҡының уртаҡ ынтылыштарын, борсолоу-хафаларын, еңеүгә булған ышанысын һынландыра. Ауыр мәлдәр һис шикһеҙ үтеренә һәм тормоштоң матур итеп дауам итеренә шик ҡалдырмай. Шуныһы менән мөһим дә ул. Рәүилә Ғатауллина.Фото, видео: vk.com/gaskarov.ensemble (Видеоны гәзитебеҙҙең төркөмөндә ҡарарға мөмкин).