Башҡортостанда туристик тармаҡта инвестиция әүҙемлеге артҡан

Башҡортостан Республикаһы Хөкүмәтендәге аҙналыҡ оператив кәңәшмәлә модулле капиталь булмаған урынлаштырыу сараларын булдырыу проекттарын тормошҡа ашырыу мәсьәләһе тикшерелде. Хөкүмәт Премьер-министры Андрей Назаров билдәләүенсә, Рәсәй Президентының 2024 йылдың 7 майындағы Указына ярашлы, туристик тармаҡты үҫтереү "Тотороҡло һәм динамик иҡтисад" милли маҡсатына өлгәшеүҙең мөһим компоненты булып тора. 2030 йылға эске тулайым продуктта туристик тармаҡ өлөшө 5 процентҡа тиклем, ә туристик хеҙмәттәр экспорты өс тапҡырға артасаҡ тип планлаштырыла. - Туризмды үҫтереүҙең төп күрһәткестәре буйынса Башҡортостан Волга буйы федераль округында лидерҙар иҫәбенә инә. Мәҫәлән, коллектив урынлаштырыу сараларында урынлаштырылған кешеләр һаны буйынса беҙ Волга буйында - өсөнсө, Рәсәй төбәктәре араһында 11-се урында. Һуңғы йылдарҙа тәүге тапҡыр туризм инфраструктураһына ярҙам итеү өсөн байтаҡ күләмдә федераль средстволар йәлеп итә алдыҡ. 2023-2024 йылдарҙа сумма 1,6 миллиард һум самаһы тәшкил итте, – тип хәбәр итте Андрей Назаров. Республикала туристик инфраструктураны үҫтереү, шул иҫәптән модулле капиталь булмаған урынлаштырыу сараларын булдырыу хаҡында Башҡортостан Республикаһы эшҡыуарлыҡ һәм туризм министры урынбаҫары Илнур Таҡтаев хәбәр итте. Ул 2023-2024 йылдарҙа модулле капиталь булмаған урынлаштырыу сараларын (кемпингтар һәм глэмпингтар) булдырыу буйынса инвестиция проекттарын тормошҡа ашырыуға 1 миллиард һум күләмендә субсидиялар, шулай уҡ инвесторҙарҙың үҙ средстволары – 1,4 миллиард һумдан ашыу йүнәлтелгәнен иҫкә төшөрҙө. Республиканың номерҙар фондын 750-нән ашыу берәмеккә арттырыу планлаштырыла. Ағымдағы йылда берҙәм субсидия сиктәрендә кемпинг-урынлаштырыу объекттарын (кемпингтарҙы) булдырыу буйынса бер нисә проект хупланасаҡ, тип өҫтәне Илнур Таҡтаев. Кәңәшмә аҙағында Премьер-министр муниципалитеттарға ерҙәрҙе рекреацион тәғәйенләнешкә күсереү буйынса норматив хоҡуҡи акттар ҡабул итергә һәм модулле капиталь булмаған урынлаштырыу сараларын булдырыу проекттарын тормошҡа ашырғанда маҡсатлы тәғәйенләнеш буйынса ер участкаларын файҙаланыуға контролде көсәйтергә ҡушты. Төбәктең Эшҡыуарлыҡ һәм туризм министрлығына конкурс һайлап алыуҙарын үткәреүҙе һәм 15 авгусҡа тиклем берҙәм субсидия сиктәрендә ярҙам күрһәтеүҙе тәьмин итергә йөкмәтелде. Фото: pravitelstvorb.ru.