“Яңғырауыҡлы” юлдарҙы ремонтлауға - 3,44 миллиард һум

Бөгөнгө Хөкүмәт кәңәшмәһендә республикала юлдарҙы ремонтлау тураһында һөйләшеү булды. Атап әйткәндә, халыҡтың иң нығы ялыу иткән һәм һораған юл участаларын төҙөкләндереү иғтибар үҙәгендә булды. Быйыл бындай ремонтҡа республика программаһы буйынса 3,44 миллиард һум аҡса бүленгән. Шуның 540 миллион һумы – ауыл биләмәләренә илткән юлдарҙы, шул иҫәптән ҡырсынташ һәм ҡом-ҡырсынташ материалдарын күпләп төҙөү урындарын тергеҙеүгә, 150 миллионы – коммерцияға ҡарамаған баҡсаларға инә торған юлдарҙы ремонтлауға, тағы 400 миллион һумы төньяҡ-көнсығыш райондарға: Асҡын, Балаҡатай, Дыуан, Ҡариҙел, Ҡыйғы, Мәсетле, Нуриман һәм Салауат райондарына (50-шәр миллион һумы) бүленәсәк. 114 километр оҙонлоҡтағы төбәк һәм урындағы әһәмиәттәге автомобиль юлдарын ремонтлауға һәм төҙөкләндереүгә 2 миллиард 350 миллион һум тотоноласаҡ. Кәңәшмәлә Башҡортостан Башлығы Радий Хәбиров юлдарҙы насар ремонтлауға ризаһыҙлыҡ белдерҙе. Һүҙ Красный Холм - Иҫке Уръябаш, Ҡалтасы районында Өфө - Бөрө - Яңауыл - Иҫке Йәш һәм Иглин - Красный Восход юлдары хаҡында бара. Ул транспорт һәм юл хужалығы министры вазифаһын башҡарыусы Любовь Минаковаға подрядсыларҙың эшен етди контролдә тоторға ҡушты. – Беҙ аҡса бирәбеҙ. Эште яҡшы башҡарырға мәжбүр итегеҙ! Сифатһыҙ башҡарылған эштәрҙе контролгә алығыҙ. Ошо юлдарҙы эшләгәндәрҙе язаға тарттырыу, яңынан эшләтеү һәм штраф һалырға мәжбүр итеү кәрәк, – тине Башҡортостан Башлығы. Тағы бер республикаға “яңғыраған” юл – Хәйбулла районындағы Сибай – Аҡъяр юлы. Любовь Минакова әйтеүенсә, ул әле 70 процентҡа әҙер. Был юлдың өс участкаһы – 12-22-се километр, 39-46-сы километр, 49-57-се километры ремонтланған. Планға ярашлы, объектты тулыһынса 2025 йылға тапшырырға тейештәр. “2023 йылда эштәр уңышһыҙ ойошторолдо, быны танырға кәрәк. Һәр саҡ мине алданылар. 2024-2025 йылдарҙа эшләп бөтөрөгөҙ”, - тине Радий Хәбиров. Фото: "Башинформ".