Быйыл Башҡортостанда, илдең күп төбәктәрендәге кеүек үк, яҙ һуңлап һәм насар һауа торошо менән килә. Уҙған аҙнала булған ҡырау ауыл хужалығы культураларына кире йоғонто яһаны. Был турала Хөкүмәттең оператив кәңәшмәһендә Премьер-министр урынбаҫары – ауыл хужалығы министры Илшат Фәзрахманов һөйләне. Уның белдереүенсә, түбән температура һөҙөмтәһендә яҡынса 13 мең гектар сәсеүлек зыян күргән. Башлыса күп йыллыҡ үләндәр һәм иртә яҙғы культуралар (етен, көнбағыш) зыян күргән. Бынан тыш, 525 гектарҙа сөгөлдөр, 164 гектарҙа рапс һәм 100 гектарҙа көнбағыш һәләк булған. Әлеге ваҡытта сәсеүлектәрҙе тикшереү һәм зыянды асыҡлау дауам итә. – Һауа торошона ҡарамаҫтан, яҙғы сәсеү планлы рәүештә дауам итә. Шулай ҙа ошо сәбәпле уның тиҙлеге бер аҙ кәмене: тәүлек эсендә 50 мең гектарҙа сәсеү эштәре башҡарыла. Бөгөнгә планға ҡарата йәмғеһе 43 процент майҙанда сәселгән, – тине Илшат Фәзрахманов. Әйткәндәй, 2024 йылда Башҡортостандың аграр секторына дәүләт ярҙамы өсөн яҡынса 4,3 миллиард һум ҡаралған. Фото: ufa.rbc.ru