Өфөләрҙе лә, баш ҡалабыҙ ҡунаҡтарын да магниттай үҙенә тартҡан Башҡортостан Урмансылары паркы күптән түгел реконструкцияға ябылды. Маҡсат – киләсәктә уны заман талаптарына яуап бирерлек итеп үҙгәртеү, бында ял итеүселәр өсөн уңайлы шарттарҙы тағы ла арттырыу, ҡыҫҡаһы, гөл баҡсаһына әйләндереү. Һүҙ ҙә юҡ, яңылыҡты барыһы ла шатланып ҡабул итте. Ысынлап та, был урынға икенсе һулыш биреләсәгенә тамсы ла шик юҡ. Шул иғтибарға лайыҡ, Башҡортостан Урмансылары паркы Башҡортостан Башлығы Радий Хәбировтың башланғысы менән реконструкциялана. Әйткәндәй, Хөкүмәт йортонда ойошторолған сираттағы "Йәмәғәт киңлеге сәғәте"ндә республика етәксеһе ошо мәсьәләне көн тәртибенә сығарып, асыҡ һөйләшеү ойошторҙо. – Урмансылар паркы - Өфө ҡалаһының тәбиғәт мөғжизәләренең береһе, был территорияның тәбиғилеген мөмкин тиклем һаҡлау мөһим, – тип һаҡсыллыҡҡа өндәне эш йүнәлешен билдәләгәндә Радий Фәрит улы. Башҡортостан Башлығы белдереүенсә, муниципалитеттың, урман паркын төҙөкләндерер алдынан, ҡала кешеләре менән