Бөгөнгө Хөкүмәттең оператив кәңәшмәһендә һыу объекттарында ял иткәндә, шулай уҡ янғын сыҡҡанда кешеләрҙең ғүмерен һәм һаулығын һаҡлау буйынса саралар тикшерелде. – Һуңғы 10 йылда республика биләмәһендә янғындарҙа һәләк булғандар һаны 22 процентҡа кәмене. Яҡшы күрһәткес, әммә башҡараһы эштәр байтаҡ, – тине Радий Хәбиров. – Рәсәйҙең ҡайһы бер төбәктәрендә 100 мең кешегә янғында һәләк булыусылар һаны 18,8 процент тәшкил итә, Башҡортостанда – 5,8. Бер төркөм субъекттарҙа, мәҫәлән, Дағстанда һәм Чечняла был һандар тағы ла түбәнерәк – 0,8. Шуға иғтибар итеү һәм был күрһәткескә өлгәшеү мөһим. Төбәк етәксеһе һынау рәүешендә халыҡтың күп кенә социаль яҡланмаған төркөмдәре йәшәгән бер районды билдәләргә ҡушты. Улар өсөн GPS-модулле махсус иҫкәрткестәр һатып алырға кәрәк. – Беҙ халыҡҡа бик күп янғын тураһында иҫкәртеүсе приборҙар һатып алдыҡ. Ләкин улар араһында, мәҫәлән, хәрәкәте сикләнеүе арҡаһында янғынға үҙҙәре иғтибар итә алмаған инвалидтар бар, – тине Радий Хәбиров. – Улар өсөн хәүеф сигналын бер юлы бер нисә нөктәгә, мәҫәлән, уларҙың балаларына йәки янғын һүндереү часына ебәрә алған GPS приборҙар ҡуйылыуы ихтимал. Бындай ҡоролмаларҙың һөҙөмтәлелеген анализларға кәрәк. Республика Башлығы һыуҙа үлем күрһәткестәренең түбәнәйеүен дә билдәләне. 2023 йылда 100 мең кешегә 2,86 үлем менән тамамланған бәхетһеҙ осраҡ тура килгән. – Волга буйы федераль округы төбәктәре араһында беҙ уртаса позицияларҙа торабыҙ. Шул уҡ ваҡытта Һамар өлкәһендә, Волга йылғаһы аға, был күрһәткес күпкә түбәнерәк һәм 0,41 тәшкил итә, - тип хәбәр итте Радий Хәбиров. Билдәләп үтергә кәрәк, республикала һыу инеү өсөн йыһазландырылмаған 260 урын иҫәпләнә, унда барыбер кешеләр ял итә. Радий Хәбиров республикала йыһазландырылған пляждар һанын арттырырға ҡушты, шулай уҡ Рәсәй Ғәҙәттән тыш хәлдәр министрлығының Башҡортостан буйынса баш идаралығы етәксеһе Марат Латиповтың тағылмаһы һәм кәрәкле ҡорамалдары булған еңел автомобилдән торған мобиль ҡотҡарыу постарын булдырыу тәҡдимен хупланы. – Ошо проектты пилот проекты итеп эшләргә һәм ике-өс муниципалитетта ошондай постарҙы булдырырға тәҡдим итәм. Кешеләрҙең ниндәй урындарҙа йышыраҡ һәләк булыуын ҡарарға һәм унда ҡотҡарыу постарын ҡуйырға кәрәк, – тип билдәләне төбәк етәксеһе. Башҡортостан Башлығы шулай уҡ янғында һәм һыуҙа үлем күрһәткестәрен муниципалитеттарҙың эш һөҙөмтәлелеге критерийҙары исемлегенә индерергә ҡушты. Фото: Башҡортостан Башлығы сайты.