Բագրատ Սրբազանը սփյուռքահայերին կոչ է արել շարժմանն աջակցող հավաքներ կազմակերպել

«Տավուշը հանուն հայրենիքի» շարժման առաջնորդ, Տավուշի թեմի առաջնորդ Բագրատ արքեպիսկոպոս Գալստանյանը պատգամ է ուղղել Եվրոպայում ապրող հայերին՝ կոչ անելով շարժմանն աջակցող բազմամարդ հավաքներ կազմակերպել։

«Մենք շնորհակալություն ենք հայտնում ձեզ և միևնույն ժամանակ քաջալերում, որպեսզի մեծ թվերով ներկայանաք ձեր կազմակերպած աջակցության հանրահավաքներին, ձեր ձայնը բարձրացնեք՝ այն դարձնելով համահայկական մեծ շարժում ոչ միայն սահմանափակված Հայաստանի տարածքով, այլ ամենուր, որտեղ գեթ մեկ հայ է ապրում»,- իր կոչում նշել է նա։ Նա վստահեցրել է, որ Սփյուռքում կազմակերպված ցույցերը ոգևորում են հայրենակիցներին ՀՀ-ում։

«Ձեր ձայնի ինքնաարտահայտության կերպով մեծ ուժ ու եռանդ եք հաղորդելու հայաստանաբնակ ձեր հայրենակիցներին և այս ամբողջ շարժմանը։ Միասին կհասնենք այս գործըթացի հաղթական ավարտին»,- ասել է Բագրատ Սրբազանը։ ՀՀ ԱԳՆ-ի ապրիլի 19-ի հայտարարությունից հետո  Տավուշի սահմանամերձ գյուղերի բնակիչները բողոքի ակցիաներ էին սկսել։

Մայիսի 4-ից «Տավուշը հանուն հայրենիքի» շարժումը Բագրատ արքեպիսկոպոս Գալստանյանի առաջնորդությամբ երթ էր սկսել դեպի Երևան, որը նպատակակետին էր հասել մայիսի 9-ին․ Երևանում հանրահավաք էր կայացել։ Սրբազանը հանրահավաքին հայտարարել էր Փաշինյանի հրաժարականի պահանջի մասին։

Սրբազանը նաև մայիսի 10-ին հանրահավաքին կոչ էր արել մշակել և կազմել սահմանազատման և անվտանգության հստակ հայեցակարգ։ Մայիսի 10-ին և 11-ին անհնազանդության ակցիաներ էին անցկացվել։ Մայիսի 11-ին ոստիկանությունը բերման էր ենթարկել ակցիայի 48 մասնակցի:  Մանրամասները՝ տեսանյութում։

Նորություններին հետևեք մեր կայքում (https://armeniatoday.news/hy), ինչպես նաև Telegram-ում (https://t.me/armtodayarm) և YouTube-ում (https://www.youtube.com/channel/UCzt73kS8-2XS9q5cLubs3ww)