Иғтибар булған ерҙә уңыш та бар Хоккей – күптәр яратып шөғөлләнгән спорт төрө. Уның менән 20 меңдән ашыу кеше мауыға. Өҫтәүенә һуңғы биш йылда спорт тармағына бик етди иғтибар бүленә, яңынан-яңы объекттар сафҡа инә. Мәҫәлән, Октябрьский ҡалаһында төҙөлгән боҙ һарайының концепцияһын иң яҡшы белгестәр эшләгән һәм техник йәһәттән тормошҡа ашырған. Улар спортсыларға күнекмәләрҙе атҡарыуы яҡшы булһын өсөн барыһын да эшләргә тырышҡан. Боҙ һарайында хоккей һәм фигуралы шыуыу менән шөғөлләнәләр. Тағы унда 50 кешегә иҫәпләнгән конференциялар үткәреү залы, 800 урынлыҡ трибуна, көс әҙерлеге һәм функциональ күнекмәләр залдары, кардиозал бар. Бынан тыш, Баймаҡта, Мәсәғүттә яңы боҙ ареналары төҙөлөр тип көтөлә. Ҙур еңеүҙәргә юл ҡайҙан башлана? Ҙур хоккей, ғәҙәттә, ихаталарҙағы бәләкәй хоккей майҙансыҡтарынан башлана. Күптәр был спорт төрөн ярата, шуға күрә уларҙың бала сағы ихаталарында сәкән уйнап, кисен зәңгәр экрандарҙан легендар матчтарҙы ҡарап үтә. Ә бәғзеләргә ҡышын эргәләрендәге шып-шыма, ялтырап ятҡан боҙ менән ҡапланған йылға-күлдәрҙә коньки шыуыу, сәкән менән шайба һуғыу оҡшай. Әйткәндәй, күптән түгел Иҫке Сибай ауыл биләмәһе башлығы Сибай Утарбаев социаль селтәрҙәге сәхифәһендә Иҫке Сибай ауылында хоккей майҙансығының барлыҡҡа киләсәге тураһында хәбәр итте. Башҡортостан Башлығы Радий Хәбировтың Баймаҡ районына эш сәфәре барышында уҡытыусылар һәм ата-әсәләр республика етәксеһенән заманса хоккей майҙансығын һорағайны. Республика етәксеһе Спорт министрлығына ошо мәсьәлә менән шөғөлләнергә ҡушҡайны. Күптән түгел барлыҡ ҡорамалдарҙы өс тағылма таҡҡан “КамАЗ”дар менән Нефтекама ҡалаһынан тейәп алып ҡайтҡандар. Былтыр Иҫке Сибайҙа, “Мәғариф” милли проектына ярашлы, 375 уҡыусы өсөн яңы мәктәп төҙөлдө һәм ишектәрен асты. Белем ойошмаһы биләмәһендә хәрәкәтле уйындар өсөн – өс, тыныс ял өсөн ике майҙансыҡ хасил булған. Физкультура-спорт зонаһында ике баскетбол, волейбол һәм еңел атлетика майҙансыҡтары, футбол майҙаны барлыҡҡа килгән. Баш ҡаланан йыраҡ урынлашмаған Өфө районы Дорогин ауылының Пикунов урамында йәмәғәт биләмәһе комплекслы төҙөкләндерелде. Воркаут өсөн ҡоролма, хоккей майҙансығы ҡуйылған, биләмәгә асфальт түшәлгән, һуҡмаҡтар рәтләнгән, фонарҙар эленгән, эскәмйәләр ҙә бар. Бынан тыш, спорт менән шөғөлләнгәндә хәүефһеҙлекте тәьмин иткән резина япма түшәлгән. ...Ҡандан килгән сәмселлекте, ныҡышмаллыҡты егеп, маһирлыҡты, етеҙлекте өҫтәп, спорттың һәр төрө, шул иҫәптән хоккей менән дә дуҫ булыу зарур. Динар ӘХМӘҘРИСЛАМОВ, Әлшәй районы хакимиәтенең спорт һәм физик культура буйынса комитет рәйесе: – Районыбыҙҙағы һәр ауыл биләмәһендә хоккей майҙансыҡтары бар. Улар спорт менән шөғөлләнеү, шул иҫәптән хоккей уйнау, конькиҙа шыуыу өсөн тәғәйенләнгән. Улар ауыл биләмәһе йәки белем усағы ҡарамағында. Район үҙәге Раевкала өс хоккей майҙансығы бар. Һөҙөмтәлә Әлшәй районында йәмғеһе 23 шундай урында спорт менән шөғөлләнергә мөмкин. Әле яһалма боҙ – боҙ һарайының – проект-смета документтары әҙерләнә. Ул Раевкалағы бассейны булған физкультура-һауыҡтырыу комплексы эргәһендә хасил булыр тип көтөлә. Был спорт объекты төҙөлөшө быйыл көҙ йәки киләһе йылдың яҙында башланыр һәм 2025 йылға төҙөлөр тип көтәбеҙ. ҺҮРӘТТӘ: Әлшәй районындағы хоккей майҙансыҡтарының береһе.