Шишмә районының Түбәнге Хәжәт ауылы халҡы “Ярҙам һәм мәрхәмәтлек өсөн” миҙалы менән бүләкләнде. Был хаҡта “Честно говоря” телеграм-каналы һөйләне. Район хакимиәте башлығы Ришат Мансуров һүҙҙәренсә, был ауыл халҡы үҙҙәренең яҡташтарына – махсус хәрби операцияла ҡатнашыусыларға даими ярҙам күрһәтә. “Фатима” фольклор төркөмө ағзалары башланғысы менән Ватан яҡлаусыларыбыҙға тыуған йорт йылыһын тапшырыу эше башланды. Һуңынан ауылдың башҡа кешеләре уларға ҡушылды. Рәсәй Хәрби-йыһан көстәре офицерҙары Мәскәүҙән беҙҙең район халҡы менән яҡындан танышырға килде. Ҡунаҡтар Торахан мавзолейында, Хажи Хөсәйен-бәк исемендәге мәсеттә, Пресвятая Богородица Успениеһы ғибәҙәтханаһында булды, шулай уҡ Еремеев ауылынан яҡташтарыбыҙ өсөн маскировка селтәре бәйләгән оҫталар менән осрашты", – тип яҙҙы Ришат Мансуров үҙенең телеграм каналында. “Награда тылда махсус хәрби операцияла хәрби бурыстарын үтәгән яугирҙәребеҙгә ярҙам иткән кешеләрҙе дәртләндереү өсөн раҫланды. Түбәнге Хәжәт халҡы хәрби хеҙмәткәрҙәргә ярҙам ойоштороуға ҡарашы менән беҙҙең хәрби частың иғтибарын йәлеп итте. Бөтә ауыл халҡы, бөтәһе 92 кеше йәшәй, ярҙам йыйып, хәрбиҙәребеҙгә тапшыра. Ауыл халҡы тапшырған йылылыҡ, уларҙың хаттары, теләктәре хәрбиҙәребеҙгә барып етте. Был яугирҙәребеҙ өсөн бик мөһим”, – тип белдерҙе Хәрби-йыһан көстәре идаралығының хәрби-сәйәси эштәр буйынса үҙәге командиры урынбаҫары Александр Федоров. “Ярҙам һәм мәрхәмәт өсөн” миҙалы Рәсәй оборона министры бойороғо менән 2023 йылдың 17 декабрендә раҫлана. Фото һәм мәғлүмәт сығанағы: “Башинформ” агентлығы.