Мөрсәлим карьеры. "Әр-Рәхим" мәсете. Кем башҡорт телен һәм мәҙәниәтен ҡыҫырыҡлай?

Бөгөнгө темалар: 1. Салауат районы, Мөрсәлим ауылы. Был ауыл кешеләре күптән инде Ростов өлкәһенең "Шахтинский карьер" компанияһының эшмәкәрлегенә бәйле ҙур ҡыйынлыҡ кисерә. Компания ҡырсынташ ятҡылығын үҙләштереү менән шөғөлләнә. Бик намыҫһыҙ шөғөлләнә тип өҫтәр инем. 2. "Әр-Рәхим" мәсете төҙөлөп бөтәсәк. Ураҙа байрамында Башҡортостан Республикаһы Башлығы Радий Хәбиров ошондай вәғәҙә бирҙе. Быйыл мәсетте төҙөүгә бер миллиард һум аҡса йүнәлтеү планлаштырыла. Был - республика халҡы өсөн күптән көтөлгән яңылыҡ. Мәсетте төҙөү ваҡытында килеп тыуған ҡатмарлыҡтар тураһында Башҡортостанда һәр мосолман белә. 3. 2024 йылдың 27 апрелендә «Башҡорт теленән халыҡ-ара диктант» халыҡ-ара мәғариф акцияһы үтте. Бөгөн ул матур йолаға әүерелде тип тулы ышаныс менән әйтергә була. Быйылғы акцияның күләме ҡыуандыра. Унынсы тапҡыр ойошторолған халыҡ-ара диктантта ҡатнашыусылар һаны 400 меңдән ашып китте. Бөтә донъяла 3018 майҙансыҡ ойошторолдо. Шуларҙың 2689-ы – Башҡортостанда, 283-ө - Рәсәй төбәктәрендә, 46-һы - сит илдәрҙә. Вәлитов ТВ.