Үрге Гөлөм халҡы көтөп алды

Быға тиклем Стәрлебаш районының Үрге Гөлөм ауылында медицина учреждениеһы булмағанлыҡтан, халыҡ күрше ауыл пункттарына йәки район үҙәгенә медицина ярҙамы алыу өсөн йөрөргә мәжбүр булды. “Һаулыҡ һаҡлау” милли проектының тәүге звеноны яңыртыу программаһына ярашлы, ошо көндәрҙә Үрге Гөлөмдә яңы медицина пункты асылды. Программаның төп маҡсаты – халыҡҡа медицина ярҙамын алыу мөмкинлеген киңәйтеү. Яңы фельдшер-акушерлыҡ пункты 158 пациентты хеҙмәтләндерә, уларҙың 15-е балалар. Медицина учреждениеһы уңайлы кабинеттар, заманса ҡорамалдар, шул иҫәптән, дефибриллятор, портатив электрокардиография аппараты менән йыһазландырылған. Халыҡҡа медик-санитар ярҙам күрһәтеү өсөн бөтә тейешле шарттар булдырылған: һалҡын һәм ҡайнар һыу, электр уты үткәрелгән, ҡабул итеү, процедура кабинеттары бар. –Ауылда фельдшер-акушерлыҡ пункты барлыҡҡа килеүе һәр кем өсөн мөһим ваҡиға. Беҙ уны көтөп алдыҡ. Йорт эргәһендә генә урынлашҡан яңы эш урынына көн һайын килеү шатлыҡ ҡына. Быға тиклем Ямғырсы ауылына эшкә йөрөнөм, – ти фельдшер Мөнирә Иҙрисова. Рәсәй Президенты Владимир Путиндың “май“ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение") төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығының матбуғат хеҙмәте.