Башҡортостан Хөкүмәте Премьер-министры Андрей Назаров Өфөлә донъя кимәлендәге халыҡ-ара кампусты төҙөү буйынса штаб ултырышын уҙғарҙы. -Тәүге сиратты төҙөүҙе былтыр тамамланыҡ. Хәҙер кампустың икенсе сиратын төҙөй башлайбыҙ, - тине Премьер-министр. Кампустың беренсе сиратын төҙөү былтыр декабрь айында йомғаҡланды. 37 мең квадрат метрға тиң бина үҙенең резиденттары – төбәктең әйҙәүсе вуздары һәм инновация компаниялары өсөн ишектәрен асты. IQ-парктың майҙансыҡтарында 21 ғилми лаборатория эш башланы. Улар вуздар һәм индустриаль партнерҙар менән тикшеренеүҙәр алып бара. Икенсе сират яҡынса 103 мең квадрат метр майҙанда төҙөлөштө күҙаллай. Проект буйынса был 4300 урынға иҫәпләнгән студенттар ятағы, уҡыу блоктары, лабораториялар, шулай уҡ йәмәғәт-эшлекле киңлектәр һәм башҡа биналар. Хәтерегеҙгә төшөрәбеҙ, Президент Владимир Путин ҡушыуы буйынса “Фән һәм университеттар” милли проекты ярҙамында Рәсәйҙә заманса кампустар селтәре булдырыла. Уларҙа яҡынса 400 лаборатория, 149 инфраструктура объекттары асылған, 300-ләп яңы белем биреү программалары ебәрелгән, студенттар өсөн йәшәүгә 60 мең урын йыһазландырылған. 2030 йылға кампустар һаны 25-кә тиклем артасаҡ, 2036 йылға 40-ҡа етәсәк. Республика Башлығы Радий Хәбиров башланғысы менән Башҡортостан кампустарҙың тәүге төркөмөнә инә алды һәм федераль ярҙамға эйә булды. Фото: Башҡортостан Хөкүмәте сайтынан.