Яңы ғына эшкә урынлашҡан һымаҡ булһам да, 26 йыл үтеп тә киткән!

Флүрә Абдулхай ҡыҙы Шакирова Белорет районының Н.Н. Зимина исемендәге китапханалар системаһына 1998 йылда китапханасы булып килә. “Яңы ғына эшкә урынлашҡан һымаҡ булһам да, 26 йыл үтеп тә киткән. 2000 йылда китапхана етәксеһе итеп тәғәйенләндем”, – тип белдерҙе ул. Дауыт Юлтый исемендәге китапхана 2011 йылда "модель" статусын ала һәм тыуған яҡты өйрәнеү йүнәлешендә эшен дауам итә. Был статусты тик юғары кимәлдә тотоу өсөн күп көс һалына, күп эштәр башҡарыла. Әлбиттә, был эштә Флүрә Абдулхай ҡыҙы ҙур өлөш индерә. – Башҡорт яҙыусыларының һәм шағирҙарының, сәнғәт эшмәкәрҙәренең тормош юлы һәм ижады тураһында китапханала бик күп мәғлүмәт тупланды. Китапханала тағы ла башҡа бик күп йүнәлештә эшләү өсөн төрлө проекттарға ҡушылыуҙы өҫтөн күрәм. Милли мәҙәниәт” программаһы буйынса бик төплө эшләйбеҙ, шулай уҡ “Рус донъяһы”, “Патриотик һәм гражданлыҡ позицияһы”, “Яҡшылыҡ һәм мәрхәмәтлек”, “Китапхана һәм ғаилә”, “Сәләмәт тормош рәүеше”, “Тәбиғәт. Экология, Тормош. Киләсәк”, “Халыҡтың хоҡуғын яҡлау” исемле проект-программаларға ла ҙур өҫтөнлөк бирелә. Башҡорт телен үҫтереү, ошо телдә күберәк аңлашыу маҡсатында, бик күп саралар тик башҡорт телендә үткәрелә, шул иҫәптән рус теленә лә ҙур иғтибар бирәбеҙ, сөнки Белорет ҡалаһындағы педагогик, металлургия, медицина колледжы студенттары тупланған төркөмдәрҙә төрлө милләт балалары уҡый, – ти Флүрә Шакирова. 2015 йылда Флүрә Абдулхай ҡыҙы Белорет районының “Иң яҡшы мәҙәниәт хеҙмәткәре” тип таныла. Район-ҡала йәмәғәт эштәрендә әүҙем ҡатнаша – Белорет ҡала-район башҡорттар ҡоролтайы, “Ағинәйҙәр” ойошмаһы ағзаһы булып тора. Ирекмәндәр хәрәкәтендә ҡатнаша – “Белорет йондоҙҙары” фестивалендә, “Алтын юрта” төбәк-ара театр фестивалендә. 2021 йылда үткән Бөтә донъя фольклориадаһында куратор була, 23 йылдан ашыу һайлау кампанияһында эшләй. – Төп эшем – китапханала. Был йүнәлештә бөтә күрһәткестәр ҙә юғары булырға тейеш, тип ҡарайым. Шуның өсөн төрлө сараларға иғтибар бирелә. Йылына китапханала 200-220-гә яҡын сара үткәрелә. Айырыуса Белорет еренән сыҡҡан яҙыусыларҙың әҫәрҙәрен пропагандалау өҫтөндә бик ныҡ эшләйбеҙ: осрашыуҙар, тура эфирҙар, конкурстар үткәрәбеҙ, үҙебеҙ ҙә ҡатнашабыҙ. Төрлө темаларға арналған оҫталыҡ дәрестәре, Пушкин картаһы буйынса саралар ҙа йыш үткәрелә. Быйыл Иҙел башы яҙыусылары Зөлфирә Сөләймәнова, Фәриха Вәлиуллина, Гөлсөм Мостафина менән фәһемле осрашыуҙар, тура бәйләнеш үтте. Илһөйәрлек, тәрбиә эшенә ҙур иғтибар бирелә. Башҡортостан яҙыусыларына бәйле 35-тән артыҡ сара үткәрелгән. Сараларҙан тыш, яңы китаптарҙы таратыу әүҙем алып барыла, тыуған яҡты өйрәнеү буйынса картотекалар, каталогтар һәр ваҡытта тулыландырыла. Эйе, башҡараһы эштәр ҙә бик күп, бөтәһе тураһында ла һөйләп китеп булмай. Ә инде үткәрелгән саралар хаҡында мәғлүмүттәрҙе социаль селтәрҙәге төркөмдәр аша таратып барабыҙ. Эшемде яратам, алда бик ҙур пландар тора, – тип һөйләне ул. Флүрә Шакированың эше тейешле баһаланып бара – дипломдар, грамоталар менән бүләкләнә, “Башҡортостан Республикаһының барлыҡҡа килеүенең 100 йыллығы”, “Ал да нур сәс халҡыңа” миҙалдарына лайыҡ булған. Тәжрибәле китапханасы Флүрә Шакирова 27 май – “Башҡортостан” гәзите Китапханасылар көнө һәм 24-26 майҙа үтәсәк “Китап байрамы” уңайынан китапханасылар араһында ойошторған “Китапҡа һөйөү уятам” тигән конкурста ҡатнаша. Уңыштар теләйбеҙ! Фотолар: Флүрә Шакированың ғаилә альбомынан.