Н.М. Родионова аатынан Сунтаардааҕы оҕо дьоҕурун сайыннарар киин (Пионердар дьиэлэрэ) 65 сыллаах үбүлүөйүнэн кулун тутар 27 - муус устар 06 күннэригэр Сунтаартан Дьокуускай куоракка автобуһунан экспедицияҕа сырыттыбыт.
«Квартал труда» креативнай кластерга уонна ИТ-Технопаркаҕа
Дьокуускайга аныгы информационнай технологиялар муҥутуурдук сайдыбыт, киһи хараҕа көрөн манньыйар кыраһыабай эйгэни үөскэтэр сирдэрэ – “Квартал труда” креативнай кластерга уонна ИТ технопаркаҕа экскурсиялаатыбыт.
Икки сыллааҕыта аһыллыбыт “Квартал труда” креативнай кластер 1976 сыллаахха тутуллубут түөрт этээстээх эт кэмбинээтин реконструкциялаан, аныгы оборудованиенан уларытан киһи кута-сүрэ тохтуур маанылаах сиригэр Виктория сырытыннарда. Харах халтарыйар кэрэтэ ХR устуудьуйаҕа Вилюян истиэнэни бүтүннүү сабардаабыт экраҥҥа видео клип устуутун туһунан, Алексей светокоррекция устуудьуйатыгар өҥнөр дьүөрэлэһиилэрин кистэлэҥин, онтон тыас-уус, саҥа-иҥэ устуудьуйатыгар Аркадий “Егор Чээрин” сахалыы киинэттэн быһа тардыыны көрдөрө-көрдөрө кэпсээтилэр. Саха эдэр ыччата айти технологиялары баһылаан үлэлии-хамсыы сылдьаллара, үлэлэриттэн дуоһуйууну ылаллара, сарсыҥҥыга эрэллээхтэрэ уоттаах харахтарыгар да көстөр.
Жатайга
Жатайдааҕы техникум устун директор, биир дойдулаахпыт, Владимир Иванович Тихонов уонна эбии үөрэхтээһин сэбиэдиссэйэ, директор сүбэһитэ Надежда Васильевна Жураховская арыаллаан интэриэһинэй экскурсияҕа сырыттыбыт. «Техникумҥа 1000 устудьуон үөрэнэр, уопсай дьиэлээхпит, быйыл эргэ үөрэнэр корпуска капитальнай өрөмүөн ыытыллыахтаах,”- диэн Владимир Иванович кэпсиир. Үөрэнэр кэбиниэттэр “Үөрэҕирии” национальнай бырайыак иитинэн толору хааччыллыбыттар, устудьуоннар судостроение, мехатроника уонна мобильнай робототехника, судовождение, сварщик, электромонтер, медицинскэй сиэстэрэ, повар, кондитер о.д.а. оробуочай орто анал идэлэргэ үөрэнэллэр. Иллэҥ кэмнэригэр вокальнай инструментальнай ансамбль, үҥкүү, айар үлэ мастарыскыайыгар дьарыктаналлар эбит. Манна идэ ылбыт исписэлиистэр ЛОРП (Өлүөнэтээҕи өрүс пароходствотын холбоһугар) капитаннар 180 тыһ., механиктар 160 тыҺ., электромеханиктар 120 тыһ. хамнаска үлэлиир кыахтаналлар. Олохтоох каадырдары бэлэмнээн таһаарар соруктаах үлэ үөһүгэр сылдьар техникум эрэллээхтик иннин диэки хардыылыыр.
Түмүк
Отучча буолан тутуспутунан уопут атастаһан, сонун көрүүлээх, интэриэһинэй кэпсээннээх саҥа дьоннуун билсиһэн, күүс-уох ылынан айаммытын түмүктээтибит. Суоллааҕы кылгас бэлиэтээһиннэрбин болҕойон аахпыт ааҕааччыларбар махтанабын. Экспедиция кыттыылаахтара маастар-кылааска сырыттылар, саҥа бырайыактары олоххо киллэриигэ кэпсэтиилэри ыыттылар, үлэлэрин торумнаатылар. Тус бэйэм санаабар дьиэ кэргэнинэн (кэргэним суоппардаан, уоллаах кыыһым сааскы каникулларыгар сынньана) биир идэлээхтэрбин кытта бастакы айаным буолла. "Суол доҕордоох, айан аргыстаах" диэн өс хоһооно этэринии сырыыбыт табылынна, тимир көлөбүт этэҥҥэ дьиэбитигэр аҕалла. Айан амарах аргыстара Бүлүү гимназиятын автобуһун суоппара, завхоһа икки төгүл аара суолга көмөлөн эрэллээх илиилэрин утары ууммуттарыгар истиҥник махтанабыт.
Куоракка тиийэн биһиги дьиэ кэргэн икки устудьуон кыргыттарбытын, күндү күтүөтү, саҥа аймахтары көрсөн ахтылҕаммытын таһааран кэлбиппит бу дии сирдээҕи дьол, үөрүү, олохтон дуоһуйуу...
Айаммыт аартыга аһаҕас буоллун, саҥа саҕахтар арылла турдуннар!
Айна Яковлева
