Башҡортостан Башлығы Еңеү паркында Советтар Союзы Геройҙарын хөрмәтләп иҫкә алды

9 майҙа Өфөнөң Еңеү паркында Башҡортостан Башлығы Радий Хәбиров совет халҡының Бөйөк Ватан һуғышында еңеүенең 79 йыллығы хөрмәтенә тантаналы сарала ҡатнашты. Республиканың күп милләтле халҡы исеменән республика етәксеһе Советтар Союзы Геройҙары Александр Матросов менән Миңлеғәле Ғөбәйҙуллиндың үлемһеҙ батырлығына арналған һәйкәлгә сәскәләр һалды. Һәләк булған геройҙарҙы бер минут тын ҡалып, иҫкә алдылар. Радий Хәбиров шулай уҡ ике тапҡыр Советтар Союзы Геройы Муса Гәрәевтың ҡәберенә, Миңлеғәле Шайморатов һәм Таһир Күсимовтың бюстарына, мемориаль комплекстың республикала тыуып үҫкән геройҙарға арналған стела янындағы тыл хеҙмәтсәндәре һәйкәленә сәскәләр һалды. Ул тыл хеҙмәтсәндәренең төп һөнәрҙәрен символлаштырған скульптура төркөмөн үҙ эсенә ала: нефтсе, ҡорос ҡойоусы, ураҡсы, тегенсе һәм башҡалар. Стелала хәрби техника, ауыл хужалығы тауарҙары менән фронтҡа оҙатылған составтарҙы һүрәтләгән бронза горельеф композицияһы урынлашҡан. Стеланың өҫкө өлөшөндә Еңеү ордены балҡый. Республика Башлығы Өфөнөң Орджоникидзе районы коллективтарының концертын ҡараны һәм Бөйөк Ватан һуғышы, хеҙмәт ветерандары һәм хәрби операцияла ҡатнашыусылар менән аралашты. Хәтерегеҙгә төшөрәбеҙ, Еңеү паркы 1947 йылда Бөйөк Ватан һуғышында фашистарҙы еңеү хөрмәтенә асыла. Парк үҙенең рәсми исемен 1980 йылда Матросов һәм Ғөбәйҙуллин һәйкәле төҙөлгәндән һуң ала. Был ваҡиға һуғыш тамамланыуҙың 35 йыллығын байрам итеү көнөндә була. Артабан хәрби техника, иҫтәлекле ҡоралдар ҡуйыла. Һуңынан Бөйөк Ватан һуғышы ваҡытында һәләк булған башҡорт геройҙарының исемдәре яҙылған аллея барлыҡҡа килә. 2000 йылдан паркта Республика Хәрби Дан музейы эшләй башлай. Фото: "Башинформ" агентлығы.