Бөгөн, 9 майҙа, Бөйөк Еңеү көнөндә, Өфөнөң Совет майҙанында Башҡортостан Башлығы Радий Хәбиров Рәсәй Геройы, легендар дивизия командиры Миңлеғәле Шайморатовтың һәйкәленә сәскәләр һалды. Тантаналы сарала РФ Дәүләт Думаһы һәм БР Дәүләт Йыйылышы - Ҡоролтай депутаттары, Хөкүмәт ағзалары, ветерандар ойошмалары һәм хәрби туғанлыҡ вәкилдәре, махсус хәрби операция яугирҙәре ҡатнашты. Ватанды һаҡлаусыларҙы бер минутлыҡ тынлыҡ менән иҫкә алдылар. Төбәк етәксеһе Башҡортостанда йәшәгән һәр кешенең тормошонда Еңеү көнөнөң айырым ролен һыҙыҡ өҫтөнә алды һәм, Бөйөк Ватан һуғышы ветерандары тураһында хәтер һәр ваҡыт кешеләрҙең йөрәгендә йәшәйәсәк, тип билдәләне. - Был байрамды беҙ тулҡынланып ҡаршы алабыҙ. Еңеү көнө беҙҙең тормошта, айырыуса хәҙер, ошо ябай булмаған заманда, мөһим урын биләй. Беҙ ҡот осҡос һуғышта еңеү яулаған ата-бабаларыбыҙҙың ҡаһарманлығына мөрәжәғәт итәбеҙ, байрамдың әһәмиәтен аңлайбыҙ, - тине Радий Хәбиров. - Атай-олатайҙарыбыҙға Бөйөк Ватан һуғышында еңеүҙәре, фашистар армияһын тар-мар итеүҙәре өсөн айырым рәхмәт. Беҙ үҙ геройҙарыбыҙҙы иҫләргә тейешбеҙ. Тап Совет майҙанында 1942 йылдың мартында 112-се Башҡорт кавалерия дивизияһы командиры Миңлеғәле Шайморатов республика етәкселегенә яугирҙәрҙең фронтҡа ебәреүгә әҙер булыуы тураһында белдерә. 112-се Башҡорт кавалерия дивизияһы Бөйөк Ватан һуғышы йылдарында Брянск, Воронеж, Көньяҡ-Көнбайыш фронттарында, Сталинград алышында ҡаты алыштарҙа еңеүҙәр яулай. Күрһәткән батырлығы өсөн дивизия 16-сы Гвардия кавалерия дивизияһы итеп үҙгәртелә. Дивизия шулай уҡ Чернигов-Припятск операцияһында ҡатнаша, был алыштарҙа күрһәткән батырлығы өсөн уға Чернигов исеме бирелә, Днепр янындағы алышта, Украинаны, Беларуссияны, Польшаны азат итеүҙә, Көнсығыш-Померанск һәм Берлин стратегик операцияларында ҡатнаша. Дивизияның 3860 яугире орден һәм миҙалдар менән бүләкләнә, шул иҫәптән 78-е – Советтар Союзы Геройы, ә бишәүһе - Дан орденының тулы кавалеры. Хәтерегеҙгә төшөрәбеҙ, һәйкәлде 2022 йылдың 11 октябрендә астылар. Өфө Бөйөк Еңеү хөрмәтенә илдең иң әһәмиәтле мемориаль комплекстары менән бер рәттә торған уникаль һәйкәлле булды. Яҡташтарыбыҙҙың, күп милләтле илебеҙҙең Бөйөк Ватан һуғышында күрһәткән батырлығы алдында баш эйәбеҙ. Фото: Башҡортостан Башлығы сайтынан.