Рәмил Шәмсетдинов МХО-ла йәнә хеҙмәттәштәренә атҡан, тиҙәр

Ошо көндәрҙә социаль селтәрҙәрҙә шомло хәбәр таралды: имеш төрмәлә ултырған Рәмил Шәмсетдинов махсус хәрби операция биләмәһенә киткән һәм унда саҡта йәнә күп хеҙмәттәштәрен атып үлтергән. Рәмилде күптәр белә. Ул 2019 йылда Байкал аръяғындағы хәрби частә һигеҙ хеҙмәттәшен атып үлтергәйне. Егетте бик оҙаҡ ваҡыт тикшергәндән һуң психик яҡтан һау тип таптылар һәм 24,5 йылға иркенән мәхрүм иттеләр. Әле ул Төмәндә төрмәлә ултыра. Ә әлеге хәбәрҙәргә килгәндә, баҡһаң, ул ысынлап та быға тиклем “Вагнер” шәхси хәрби кампанияһына эләгергә тырышып ҡараған. Тик уның адвокаты хәбәр итеүенсә, уға рөхсәт итмәгәндәр. Шуға күрә егет әле Төмәндә төрмәлә ултыра. Бында уның эшләп йөрөгәне, атаһы һәм туғандары менән осрашып торғаны билдәле. Июндә уның тыуған көнө була, шул сәбәпле атаһы уның янына оҙайлы ваҡытҡа күрешергә барырға йөрөй икән. Адвокаттан Рәмил Шәмсетдинов нисек булһа ла алдараҡ төрмәнән сыға аламы тип һорағандар. Баҡһаң, 2035 йылда уның УДО ваҡыты етә икән. Әгәр ул үҙен һәйбәт тотһа бәлки шул саҡта иреккә сығырға тырышып ҡарар.