Башҡорт дәүләт медицина университетының “Киләсәк медицинаһы” идаралығы начальнигы, Республика инженер лицей-интернатының химия уҡытыусыһы Айнур Ғүмәров мартта үткән дәүләт башлығын һайлауҙа Башҡортостандан ышаныслы кеше ине. Бөгөн ул Президенттың инаугурацияһы тантанаһында ҡатнашты һәм үҙенең тәьҫораттары менән уртаҡлашты. Айнур Ғүмәров Дәүләт башлығы инаугурацияһында туранан-тура ҡатнашҡан 2,5 мең кеше иҫәбенә инде. Уның һүҙҙәренсә, уға ошондай әһәмиәтле һәм дәүерле ваҡиға ныҡ тәьҫир иткән. “Владимир Путиндың Рәсәй Президенты вазифаһына инеү тантанаһында ҡатнашыу минең өсөн ҙур хөрмәт булды”, – тип белдерҙе Айнур Ғүмәров. Уның һүҙҙәренсә, Владимир Путин үҙенең телмәрендә мөһим теманы күтәрҙе – Рәсәйҙең ҡеүәтен нығытасаҡ, дәүләтселекте үҫтерәсәк йәш быуынды тәрбиәләү. Уның нигеҙендә – милләт-ара татыулыҡ, Рәсәйҙә йәшәүсе бөтә халыҡтарҙың традицияларын һаҡлау. Айнур Ғүмәров фекеренсә, был Башҡортостан кеүек күп милләтле республика өсөн бик мөһим, ул халыҡтар араһында күп быуатлыҡ дуҫлыҡ, күршеләрсә татыу мөнәсәбәттәр өлгөһө булып тора ала. Йәмғиәтте бергә туплау шулай уҡ мөһим, тип һыҙыҡ өҫтөнә алды Айнур Ғүмәров. Һәм бөгөнгө инаугурация тантанаһы, уның һүҙҙәренсә, был тәрән мәғәнәгә эйә. Хәтерегеҙгә төшөрәбеҙ, Владимир Путиндың ышаныслы кешеләре исемлегенә 346 кеше ингән. Башҡортостандан улар – хирург, профессор, медицина фәндәре докторы Вил Тимербулатов, Республика инженер лицей-интернатының химия уҡытыусыһы Айнур Ғүмәров, Башҡортостандың Йәмәғәт палатаһы рәйесе, Башҡортостан дәүләт хеҙмәте һәм идара итеү академияһы ректоры Данияр Абдрахманов, шулай уҡ республиканың халыҡ артисы Рушанна Бабич. Фото: "Башинформ".