"Президенттың Башҡортостанға ҡарата йылы мөнәсәбәтен юғары баһалайбыҙ"

7 майҙа Мәскәүҙә Башҡортостан Башлығы Радий Хәбиров Владимир Путиндың Рәсәй Федерацияһы Президенты вазифаһын ҡабул итеү тантанаһында ҡатнашты. Рәсәй Федерацияһы Конституцияһының 82-се статьяһына ярашлы, Владимир Путин Федерация Советы ағзалары, Дәүләт Думаһы депутаттары һәм Рәсәй Федерацияһы Конституция Суды судьялары алдында Рәсәй халҡына ант бирҙе. Конституция суды рәйесе Валерий Зорькин Владимир Путиндың Рәсәй Федерацияһы Президенты вазифаһын ҡабул итеүе тураһында иғлан итте. Инаугурациянан һуң Башҡортостан Башлығы журналистарға үҙенең тәьҫораттары менән уртаҡлашты. – Был минең инаугурация тантанаһында тәүгә ҡатнашыуым түгел. Ул һәр ваҡыт бик тантаналы үтә. Бында айырым мөхит, бөйөк илебеҙ – етәкселәр ҙә, ижади кешеләр ҙә, милләттең бөтә төҫө тупланған, – тине Радий Хәбиров. – Хәҙер беҙ артабан ҡарарҙар көтәбеҙ. Президент алдағы алты йылға үҙенең Федераль Йыйылышҡа Мөрәжәғәтнамәһендә илебеҙҙең үҫеш һыҙаттарын билдәләне. Бүленәсәк аҡса, саралар планы менән. 2025 йылдан яңы милли проекттарҙың күбеһе эшләй башлай. Шуға күрә балалар баҡсаларын, колледждарҙы, университеттарҙы, мәктәптәрҙе, беренсел медицина звеноһын ремонтлау буйынса ғаризалар әҙерләй башланыҡ та. Төбәк етәксеһе Рәсәй Президентының Башҡортостанға ҡарата йылы һәм ихтирамлы мөнәсәбәтен айырым билдәләне. – Был ҡәҙерле нәмә һәм республика халҡының, быуындың быуын артында бик намыҫлы эшләүе, һәр ваҡыт Рәсәй терәге булыуы менән бәйле. Бөйөк Ватан һуғышында ла, хәҙер, махсус хәрби операция ваҡытында ла шулай була. Беҙҙең нисә егет һәм бүлексәнең унда булыуын, уларҙың хәрби бурыстарҙы ни тиклем һөҙөмтәле үтәүен үҙегеҙ күреп тораһығыҙ, – тине Радий Хәбиров. – Республика иҡтисады ла тейешле кимәлдә үҫешә. Был – ябай булмаған шарттарҙа илдең үҫеше өсөн мөһим фактор. Әлбиттә, Президенттың Башҡортостанға ҡарата бындай мөнәсәбәтен юғары баһалайбыҙ һәм уның менән ғорурланабыҙ. Быны һаҡларға кәрәк. Фото: Башҡортостан Башлығы сайты.