Президент халыҡҡа мөрәжәғәт итте

Бөгөн Мәскәүҙә, Кремль һарайында Рәсәй Президенты Владимир Путиндың инаугурацияһы уҙҙы. Тантананан һуң Рәсәй Президенты илебеҙ граждандарына мөрәжәғәт итте һәм тәү сиратта бөтә төбәктәрҙәге рәсәйҙәргә, әле Ватан өсөн көрәшеүселәрҙең барыһына ла рәхмәт белдерҙе. – Президент вазифаһына инеүҙең ошо тантаналы һәм яуаплы минуттарында илебеҙ төбәктәрендә Рәсәй граждандарына, Тыуған илебеҙ менән бергә булыу хоҡуғын яҡлаусы тарихи ерҙәрҙә йәшәүселәргә, махсус хәрби операцияла ҡатнашыусыларға, Ватан өсөн көрәшеүселәрҙең һәммәһенә лә рәхмәт әйткем килә. Миңә күрһәтелгән ышанысығыҙ һәм ярҙамығыҙ өсөн тағы ла бер тапҡыр рәхмәт әйтәм. Рәсәй яҙмышын бөгөнгө һәм киләсәк быуындар хаҡына үҙебеҙ генә билдәләйәсәкбеҙ. Ауыр, һынылышлы осорҙо лайыҡлы үтербеҙ, тағы ла көслөрәк булырбыҙ тип ышанам”, – тине Владимир Путин. Был – оло хөрмәт, бурыс һәм изге бурыс, тип белдерҙе дәүләт башлығы. – Рәсәй халҡының мәнфәғәттәре, именлеге киләсәктә лә минең өсөн барыһынан да өҫтөнөрәк булыр тип ышандырам. Миллионлаған кешеләрҙең берҙәм ихтыяры – ул ғәйәт ҙур көс, дөйөм, ныҡлы ышаныс билдәһе, бөгөнгө һәм киләсәк быуындар өсөн Рәсәй яҙмышын үҙебеҙ билдәләйәсәкбеҙ. Һеҙ, Рәсәй граждандары, ил курсының дөрөҫлөгөн иҫбатланығыҙ. Был тап хәҙер, етди һынауҙар менән осрашҡан саҡта, ҙур әһәмиәткә эйә. Бында уртаҡ тарихи маҡсаттарыбыҙҙы тәрән аңлауҙарын, Рәсәйҙең һайлауын, үҙ ҡиммәттәрен, азатлығын һәм милли мәнфәғәттәрен тайпылышһыҙ яҡларға тәүәккәл булыуыбыҙҙы күрәм. Ошо ҡатмарлы, һынылышлы осор аша лайыҡлы үтербеҙ, тағы ла көслөрәк булырбыҙ һәм үҫеш маҡсаттарына өлгәшеүгә йүнәлтелгән оҙайлы сроклы пландарҙы һәм күләмле проекттарҙы мотлаҡ бойомға ашырырбыҙ тип ышанам”, – тине Владимир Путин. Рәсәй Президенты халыҡты һаҡлауҙы төп бурыстарҙың береһе тип атаны. Ул, күп быуатлыҡ ғаилә ҡиммәттәренә, йолаларына ярҙам артабан да йәмәғәт һәм дини берекмәләрҙе, сәйәси партияларҙы, бөтә власть кимәлдәрен берләштерер, тигән ышаныс белдерҙе. “Илде һәм төбәктәрҙе үҫтереү буйынса ҡарарҙарыбыҙ һөҙөмтәле һәм ғәҙел булырға, Рәсәй ғаиләләренең көнкүрешен, йәшәү сифатын күтәрергә тейеш. Беҙ Рәсәйҙә ышаныслы һәм ғәҙел партнер күреүсе бөтә илдәр менән изге мөнәсәбәттәрҙе нығытыуға асыҡ булдыҡ һәм буласаҡбыҙ. Был, ысынлап та, донъялағы күпселек. Беҙ көнбайыш дәүләттәре менән диалогтан баш тартмайбыҙ. Һайлау улар яғында: артабан да Рәсәй үҫешен тотҡарларға, илебеҙгә бер туҡтауһыҙ баҫым яһарлыҡ агрессия сәйәсәтен дауам итергәме йәки хеҙмәттәшлеккә һәм тыныслыҡҡа юл эҙләргәме? Тағы ла ҡабатлайым: шул иҫәптән хәүефһеҙлек, стратегик тотороҡлоҡ мәсьәләләре буйынса һөйләшеү әле лә мөмкин. Әммә көс позицияһынан түгел, ә тиңдәрсә, бер-береңдең позицияһын ихтирам итеп кенә”, – тине дәүләт башлығы. Президент фекере буйынса, тиҙ үҙгәреп торған ҡатмарлы донъяла беҙ үҙаллы һәм конкурентлыҡҡа һәләтле булырға, быға тиклем тарихта булғанса Рәсәй өсөн яңы офоҡтар асырға тейешбеҙ. “Ләкин беҙгә уның һабаҡтарын иҫләү, эске тулҡынланыуҙарҙың һәм тетрәнеүҙәрҙең фажиғәле хаҡы тураһында онотмау мөһим. Шуға күрә беҙҙең дәүләт һәм ижтимағи-сәйәси система төрлө саҡырыуҙарға һәм янауҙарға ныҡлы һәм тотороҡло булырға, үҫештең эҙмә-эҙлеклелеген һәм тотороҡлололоғон, илдең берҙәмлеген һәм бойондороҡһоҙлоғон тәьмин итергә тейеш. Шуның менән бергә тотороҡлолоҡ ҡатып ҡалыуҙы аңлатмай. Беҙҙең дәүләт, йәмәғәт системаһы һығылмалы булырға, яңыртыу һәм алға барыу өсөн шарттар булдырырға тейеш. Йәмғиәттәге мөхиттең үҙгәреүен, ышаныслылыҡ, бер-береңә яуаплылыҡ, эскерһеҙлек, намыҫлылыҡ һәм батырлыҡ юғары баһаланыуын күрәбеҙ. Үҙҙәренең иң яҡшы кешелек һәм һөнәри сифаттарын күрһәткән кешеләр Ватанға тоғролоҡтарын эш менән иҫбат итһен, дәүләт идаралығында, иҡтисадта, бөтә өлкәләрҙә алдынғы урындарға сыҡһын өсөн барыһын да эшләрмен. Беҙ ил үҫешендә ышаныслы күсәгилешлелекте тәьмин итергә, Рәсәйҙең ҡеүәтен нығытасаҡ йәш быуынды үҫтерергә һәм тәрбиәләргә, дәүләтселекте үҫтерергә тейешбеҙ, уның нигеҙендә – милләт-ара татыулыҡты, Рәсәйҙә, рус теле һәм күп милләтле мәҙәниәте менән берләштерелгән бөтә халыҡтарҙың традицияларын һаҡлау”, – тип белдерҙе Владимир Путин. Рәсәй Президенты, Конституцияла нығытылған дәүләт башлығының бөтә вәкәләттәрен файҙаланып, граждандарҙың ышанысын аҡлау өсөн барыһын да эшләйәсәкмен, тип билдәләне. – Бөгөн беҙ мең йыллыҡ тарихыбыҙ һәм ата-бабаларыбыҙ алдында яуап тотабыҙ. Улар буй етмәҫ бейеклектәрҙе алды, сөнки һәр саҡ беренсе урынға Ватаныбыҙҙы ҡуйҙы, илебеҙ һәм халҡыбыҙ менән генә ысын ҙур маҡсаттарға өлгәшеп булыуын белде һәм донъя державаһын, Ватаныбыҙҙы барлыҡҡа килтерҙе, беҙҙе бөгөн дә рухландырған триумфтарға өлгәште. Беҙ алға ышаныслы ҡарайбыҙ, киләсәгебеҙҙе планлаштырабыҙ, яңы проекттар һәм программалар билдәләйбеҙ һәм тормошҡа ашырабыҙ. Улар үҫешебеҙҙе тағы ла йылдамыраҡ, ҡеүәтлерәк итеүгә йүнәлтелгән. Беҙ берҙәм һәм бөйөк халыҡ һәм бергәләп бөтә ҡаршылыҡтарҙы еңеп сығырбыҙ, уй-фекерҙәребеҙҙе тормошҡа ашырырбыҙ. Бергәләп еңербеҙ, – тине Владимир Путин. Фото: "Башинформ".