Беләсезме мин кая эшлим? Ә юк шул, белмисез. Мин - духи ясаучы булып эшлим. Бер карасаң, бик кызык, ә бер карасаң- бик "исле" эш. Ләкин нәрсә, чыннан да, кызык - анда (минем яшьтәге) кызлар гына хезмәт куя. Ә без анда күбәү. Беренче, эшли генә башлаган вакытта кызларның шулхатлек күп булуларына гаҗәпләнә идем. Чөнки алар барысыда шундый төрле иде. Кемдер үзенә генә хас булган стильдә киенеп йөри, кемдер рок стилендә, ә кемнеңдер чәчләре аллы-гөлле, кайсысының кулларында татулар, борыннарында йөзекләр. Кемдер озын күлмәктән генә йөри, ә кемдер, киресенчә, кыска итәк- майкалардан. Кайберләре бик мөлаем, кайберләре - кырысрак. Тыныч кына эшләп утыручылар да, шулай ук, урысча итеп әйткәндә " бесбашенный"лар да җитәрлек, кыскасы - кызлар инде. Һәрбер кызның үзенчәлекле, кабатланмас буласы килә бит. Моңа карата сүзем дә, сорауларым да юк.
Духи ясауга килгәндә, мин бу эшне башта хәзинә дия идем. Чөнки, чыннан да, күзләремдә ул хәзинә булып күренде. Бу эшне бер дус кызым белән таптык, шуңа беренче көнне эшкә бергә килдек. Шимбә. Ярты гына көн эшлиләр булып чыкты. Безгә ул көнне бары пломба ясап (мөһер сугып) утырырга гына кирәк иде. Ә юк, алдалыйм, тагын бер эш эшләдек - айфон телефоннары өчен саклагыч пыялаларны махсус кечкенә тартмаларга тыгып бардык. Әйе, анда духи ясаудан тыш, тагын киемнәр, брелоклар, кесә телефоннары өчен саклагыч пыялалар белән дә эш итәләр. Эшебез җиңел иде - шуңа күрә хәзинә дә иде инде.
Дүшәмбе көнне алай ук җиңел булмады. Беренчедән, үзем генә - терәк юк иде. Икенчедән, 12 сәгать эшләргә туры килде. Шул көнне мин тәүге тапкыр духи ясадым/агыздым. Кыен иде. Миңа башта 300 кечкенә пробниклар бирделәр, ялгышмасам, 150сенә мандарин маен, ә калган 150сенә - молекула лилу маен салырга тиеш идем. Ул вакытта шприцлар белән 1,5 мл май агызасы (хәзер 1 мл). Аннары шприцка тутырып парфюм саласы. Мавыктыргыч, әлбәттә! Ләкин аларны ябасыыы... Кулларымда мазольләр чыгып бетте. Ни сәбәпле шулай дисезме? Шунда эшләүчеләр генә аңлар мине. Бу - сер булып калсын. Киләсе тукталыш - наклейка ябыштыру. Анысы үзенә бер җәфа иде. Бердәнбер шарт - аларны тигез итеп ябыштырырга кирәк. Тик кайбер пробниклар майлы булу аркасында наклейкалар аларга ябышмыйлар. Ә куллар - алар да майлы. Алдагысын әйтеп тормыйм инде. Үзегез уйлап бетерерсез. Өченче позиция - 2 төрле исле майны пупыркага төрү. Җиңелрәк эш булса да, монда игътибарлы булу кирәк. Бик игътибарлы. Чөнки 1 үк төрле 2 исле май кереп киткән булса, бер төрлеләре килеп чыкканчы, яңадан бөтен төргәннәреңне ачып карыйсың. Бу - вакытны ала. Ә вакыт - акча. Ягъни тиз эшләргә кирәк, чөнки ул билгеләнгән вакытта йөк машинасына төялеп китәчәк. Аңа кадәр, аны әле крафт пакетларга төрергә, эченә махсус визиткалар һәм "love is..." сагызлары тыгырга кирәк. Ләкин әле эш бетми, шуннан соң шушы шедеврны файл кебек махсус пакетларга ( без аны прозрачка дип йөртәбез) төрәбез һәм соңыннан "штрих-код" белән "чезный знак" (куар код) ябыштырабыз, коробкага санап салабыз, 150 төргәк булырга тиеш. Анысы инде төрлечә (санын әйтәм). Моңа барлыгы ничә сәгать китәме? Үзең генә эшләсәң бик күп вакыт китә, мәсәлән сәгать 8 дә башласаң, 4-5ләр тирәсендә бетерәсең. Бергә эшләсәгез тизрәк, әлбәттә - сәгать 2ләрдә 3ләрдә бетә. Кыскасы - төрлечә. Кемдер тизрәк, ә кемдер озаграк та эшли бит әле. Күп әйбер шуннан тора.
Флаконнар бездә күптөрле: 10 мл-лы (без аны десятки дибез), 11 мл-лы, 20 мл-лы (двадцатки), 35 мл-лы һ.б. Алар барысы да үзенчәлекле формада, мәсәлән 11 мл-лысы иннекне хәтерләтә (минем өчен).
Шприцларны һәрвакыт чиста тоталар (тырышалар дөресрәк булыр). Аның өчен аларны промывка (спирт) белән юалар. Ни өчен? Флаконнарга май салганда икенче май исе белән кушылмасын өчен.
Әлбәттә, гаҗәпкә калырлык әйберләр хәйран, әмма барлык серләрне дә ачмый калыйм. Югыйсә, ачылган сер сер буламы ни?
Ә хәзер анда шактый гына нәрсәләр үзгәрде, яңа кагыйдәләр барлыкка килде. Әмма ул кадәр куркыныч түгел, ияләшенгән инде. Тик мазольләр чыккалый. Алайда пробниклар тиз ябыла, ләкин кайберләре, әйтмим көйсезләнәләр. Наклейкасы инде тиз ябыша, Аллаһка моның өчен мең шөкер. Җитезрәк эшләргә тырышабыз, күп очракта килеп чыга. Тик хәзер инде шушы эш бердә хәзинә булып күренми.