6 майҙа Башҡортостан Башлығы Радий Хәбиров уҙғарған аҙналыҡ оператив кәңәшмәлә спортсыларға һәм уларҙың тренерҙарына социаль ярҙам саралары тикшерелде. Республиканың спорт министры Руслан Хәбибов хәбәр итеүенсә, федераль ҡануниәткә ярашлы 2023 йылда тренерҙар тейешле социаль гарантиялар менән педагогия хеҙмәткәрҙәре статусын алған. – Тәү сиратта тренерҙарға билдәләнгән аҙналыҡ йөкләмә 24 сәғәттән 18 сәғәткә тиклем бер ставкаға кәметелде, йыл һайын бирелә торған түләүле отпуск 42 календарь көнгәсә оҙайтылды, аттестация үткәндә мөҙҙәтһеҙ юғары категория алыу мөмкинлеге бирелде, – тип хәбәр итте Руслан Хәбибов. – Ошо маҡсатҡа 2023 йылда республика муниципалитеттарға дөйөм суммаһы 161 миллион һумдан ашыу субсидия бирҙе. 2024 йылға 200 миллион һум самаһы аҡса ҡаралған. Башҡортостан Башлығы Радий Хәбировтың ҡарары буйынса республикала спорт өлкәһендәге бер нисә яңылыҡ эшләй башланы. Әйтәйек, әлеге ваҡытта 167 спортсы – Рима Баталованың Спорт әҙерлеге үҙәгенә, тағы 68 кеше Адаптив спорт үҙәгенә эшкә урынлашҡан. Бынан тыш, 18 йәшкә тиклемге һәләтле спортсыларға стипендия тәғәйенләнә, 2023 йылда уны 234 спортсы алды. Олимпия, паралимпия һәм сурдлимпия чемпиондарына, призерҙарына һәм уларҙың тренерҙарына 2023 йылдан башлап ғүмерлеккә дәүләт стипендиялары түләнә. Бөгөн 88 кеше – 58 спортсы һәм 30 тренер ошо ярҙамды ала. Башҡортостан Башлығы Радий Хәбировтың башланғысы буйынса 2020 йылдан Рәсәйҙә тәүге тапҡыр “Ауыл тренеры” проекты тормошҡа ашырыла. Ошо программа ярҙамында республикала 179 тренерға ярҙам күрһәтелгән. Быйылдан алып ошоға оҡшаш “Ҡала тренеры” проекты старт алды. Дәүләт һәм ведомство наградалары менән бүләкләү спортсылар һәм тармаҡ хеҙмәткәрҙәре өсөн тағы бер дәртләндереү сараһы булды, тип өҫтәне Руслан Хәбибов. Әйтәйек, 2019 йылдан 2 748 кеше ошо хеҙмәттәре өсөн награда алды. Башҡортостан Башлығы Радий Хәбиров республиканың Спорт министрлығы коллективына ҡуйылған бурыстарҙы һөҙөмтәле хәл иткәндәре өсөн рәхмәт белдерҙе. Радий Хәбиров Башҡортостан Хөкүмәтенә Баймаҡта боҙ һарайын төҙөп бөтөргә, шулай уҡ Дыуан районының Мәсәғүт ауылында шундай уҡ объект төҙөү өсөн аҡса табырға ҡушты. – Республиканың төньяҡ-көнсығыш халҡы алдында бурысыбыҙ бар – Мәсәғүттә боҙ һарайының әҙер проекты бар, уны төҙөү өсөн аҡса табырға кәрәк, – тине Радий Хәбиров. Белешмә: Башҡортостанда физик культура һәм спорт менән 2 миллиондан ашыу кеше шөғөлләнә – 3 йәштән 79 йәшкә тиклемге халыҡтың 58,2 проценты. Республикала 13,3 мең спорт объекты эшләй, 142 учреждениела 112 меңдән ашыу бала шөғөлләнә. Фото: Башҡортостан Башлығы сайты.