Салауат ҡалаһының “Күңелдәре менән йәш” үҙәгенең көмөш ирекмәндәре махсус хәрби операция башланған тәүге көндәрҙән алып яугирҙәргә ярҙам итә. – Беҙҙең төп йүнәлеш – маскировкалау селтәрҙәре, браслеттар үреү, ҡоро душ әҙерләү. Бөтәһен дә ялға ҡайтҡан егеттәр аша оҙатабыҙ. Блиндаж шәмдәре әҙерләүҙә Сергей Комаров ярҙам итә, үҙенең оҫтаханаһында уларға парафин ҡоя. Беҙҙең командаға теләгән бер кеше ҡушыла ала, – ти ирекмәндәр етәксеһе Ильвира Анпилогова. Акцияла ҡатнашыусылар “Изгелек посылкаһы”на дымлы салфеткалар, таҫтамалдар, газ баллончиктары, серәкәй һәм талпандарҙан һаҡланыу саралары, фонарҙар, батарейкалар, медикаменттар – бер һүҙ менән әйткәндә, алғы һыҙыҡта нимә кәрәк, барыһын да һала, тип яҙа “Выбор” гәзите. Дмитрий Сорокин акцияла тәүге тапҡыр ғына ҡатнашмай. Ул был юлы ла әсәһе менән яугирҙәргә ярҙам ҡулы һуҙырға булған. – Мин акция тураһында улымдан ишеттем.Тиҙ генә магазинға барып, салфеткалар, газ баллончиктары, водород перекисы алып килдем. Ирем менән һәр саҡ яугирҙәр өсөн кәрәкле әйберҙәр әҙерләйбеҙ һәм улыбыҙ аша тапшырабыҙ. Улыбыҙ Чечнялағы хәрби хәрәкәттәрҙә ҡатнашҡан кеше, хәлде яҡшы аңлай. Ошондай акциялар ойошторолһа, тағы ла ҡатнашасаҡбыҙ, – ти Валентина Сорокина. Студенттар Азалия Москова, Карина Маскимочкина, Илона Фәйзуллина, Ольга Кузнецова һәм социаль педагог Лариса Будникова ла ҙур теләк менән акцияла ҡатнашырға булған. “Беҙ бөгөн бер усҡа тупланырға тейешбеҙ. “Салауат үҙенекеләрҙе ташламай” акцияһына беҙ ҙә ҡушылдыҡ, тәүге тапҡыр маскировкалау селтәрҙәре үрҙек, яҡшы килеп сыҡты. Һалдаттарыбыҙ иҫән-һау еңеү менән әйләнеп ҡайтһын!”– ти ҡыҙҙар. Ә бына 4-се класс уҡыусыһы Динислам Нурғәлиев дәрестән ҡайтып килгәндә, урамда ирекмәндәрҙең маскировкалау селтәрҙәре үреүен күреп, ситтә ҡала алмай, ирекмәндәргә барып ҡушыла. “Тәүҙә ҡыйыныраҡ ине, аҙаҡ күнектем”, - ти ул. Динислам алғы һыҙыҡтағы атаһына һәм һалдаттарға сәләмәтлек һәм еңеү менән ҡайтыуҙарын теләп, һүрәттәр менән биҙәп, хат та яҙған. “Минең ихлас теләктәрем атайымдың һәм яуҙаштарының күңелен күтәрһен ине“, – ти малай. Фото: https://gazetavibor.ru/