Бөгөн Ишембай районына эш сәфәре ваҡытында Башҡортостан Башлығы Радий Хәбиров “Торатау” геопаркының визит-үҙәге эргәһендә урынлашҡан этнокомплексты асыу тантанаһында ҡатнашты. Ул биҙәкләнгән алты башҡорт тирмәһенән тора. Иң ҙуры – 12 метр киңлектәге тирмә 40 ултырыу урынына иҫәпләнгән һәм кафе сифатында эшләйәсәк. Башҡортостан Башлығы быйыл апрелдә ҡул эше оҫталары менән осрашҡанда халыҡ кәсептәренә ярҙам буйынса республика программаһын киңәйтергә ҡушыуын иҫкә төшөрҙө. “Был йүнәлеш йөҙҙәрсә кеше эшләгән үҙенә күрә бер бизнесҡа әүерелде. Улар яһаған әйберҙәр ҙур һорау менән файҙалана. Был йәһәттән мотлаҡ дәүләт ярҙамы кәрәк тип уйлайым”, – тине Радий Хәбиров. Республкиа етәксеһе яңы туристик комплекс майҙансығын ҡараны, эшҡыуарҙар өсөн оҫталыҡ дәрестәрендә булды һәм “Башҡортостанда оҙон ғүмерлелек” программаһы буйынса “Торатау” геопаркына килгән Өфө пенсионерҙары менән һөйләште. Улар тыуған республиканың гүзәл урындарын күреү мөмкинлеге бирелгән өсөн рәхмәт белдерҙе. “Беҙ “Башҡортостанда оҙон ғүмерлелек” программаһын финанслауҙы дауам итәсәкбеҙ. Ҡаҙна иҫәбенә уға йылына 50 меңдән ашыу кешене йәлеп итеү ваҡыты етеренә ышанам. Башҡортостандың туристик мөмкинлектәрен йылдан-йыл киңәйтә барабыҙ”, – тине Радий Хәбиров. Фото: Башҡортостан Башлығы сайты.