Окопта өйҙән килгән кеҫәләге хаттар йәки балаларҙың изге теләктәре көс өҫтәй

Махсус хәрби операция биләмәһенә Башҡортостандан Республиканың исемле батальондары һәм хәрби формированиелары яугирҙәре өсөн сираттағы – иҫәп буйынса 123-сө - гуманитар конвой алып барып тапшырылды. Был юлы хәрбиҙәр күсмә мунса, бронетранспортер, ике “Нива” автомобиле, броня менән ҡапланған “Форд”, ике “Газель”, мейестәр, маскировка селтәрҙәре, дрон беркетеү өсөн ноутбуктар, шулай уҡ туғандарынан һәм яҡындарынан шәхси посылкалар алды. Оҙатыу тантанаһы иһә апрелдең һуңғы көнөндә Өфөнөң “Торатау” конгресс-холы алдындағы майҙанда булды. Сара “Ватан көсө” III республика форумы сиктәрендә үтте. Республика Премьер-министрының беренсе урынбаҫары Урал Килсенбаев һөйләүенсә, ашығыс хеҙмәттәр менән оҙатылған рәсми гумконвойҙарҙан тыш, төбәк халҡы йөк ташыуҙы шәхси инициатива буйынса ойоштора. – Беҙҙә йәмәғәт ойошмалары һәм битараф булмаған кешеләр күп, улар үҙҙәре автомобилдәрен тейәп, яугирҙәребеҙгә бик күп ярҙам күрһәтә. Иң мөһиме, был хәрби рухты күтәреүгә булышлыҡ итә. Беҙ яугирҙәребеҙгә ышанабыҙ һәм уларға һәр ваҡыт ярҙам итәсәкбеҙ. Еңеү беҙҙеке буласаҡ, үҙебеҙҙекеләрҙе ташламайбыҙ, — тип билдәләне Урал Таһир улы. Бөтә Рәсәй дәүләт телевидение һәм радиотапшырыуҙар компанияһының генераль директоры урынбаҫары Рифат Сабитов хәрби хеҙмәткәрҙәргә ярҙам иткәне өсөн республикаға рәхмәт белдерҙе. – Бөгөн яугирҙәргә халыҡ ярҙамы бик мөһим һәм, әлбиттә, Башҡортостан халҡына һәм төбәк етәкселегенә ҙур рәхмәт әйтергә теләйем. Бер нәмә лә халҡыбыҙҙың ихтыярын һәм рухын һындыра алмай тигәнде аңлата был. Беҙҙең яугирҙәр алғы һыҙыҡта ҙур батырлыҡ күрһәтә, яҡты киләсәгебеҙ өсөн көрәшә – улар алдында баш эйәбеҙ, — тип сығыш яһаны Рөтә Рәсәй дәүләт телерадиокомпанияһы генераль директоры урынбаҫары. “Башҡортостан” мотоуҡсылар полкының Даян Мурзин исемендәге Башҡорт батальоны командиры урынбаҫары Рәшит Фәтҡуллин хәбәр итеүенсә, бындай ярҙам махсус хәрби операцияла ҡатнашыусыларҙың хәрби әҙерлеген арттырыусы бәхәсһеҙ дәлилдәренең береһе булып тора. – Яугирҙәр һеҙҙең хәстәрлегегеҙҙе тоя, беҙҙең хаҡта уйлауығыҙҙы белә, һәм бөтә килтерелгән гуманитар ярҙам, фронтҡа килгән барлыҡ хаттар беҙҙең өсөн бик ҡәҙерле. Алғы һыҙыҡта окопта ултырғанда, ә һинән 30 метр алыҫлыҡта дошман, өйҙән килгән кеҫәләге хаттар йәки балаларҙың изге теләктәре көс өҫтәй, – тине Рәшит Фәтҡуллин. Рәсәйҙең яңы субъекттары исеменән республикаға Херсон өлкәһе губернаторы урынбаҫары, Рәсәй Хөкүмәте ҡарамағындағы Херсон өлкәһенең даими вәкиллеге етәксеһе Владимир Боделан рәхмәт белдерҙе. – Башҡортостанға ярҙам ысынлап та даими күрһәтелә һәм беҙ уға бик мохтажбыҙ, һеҙҙең ғәйәт ҙур ярҙамығыҙҙы тоябыҙ. Республика халҡына беҙҙең менән бергә булғандары өсөн рәхмәт. Бөгөн яугирҙәребеҙ Ватаныбыҙҙы яҡлап тора һәм, әйтергә ҡурҡмайым, бөтә донъяны яҡлай. Беҙ, 80 йыл самаһы элек олатайҙарыбыҙ һәм ҡартатайҙарыбыҙ кеүек үк, илде яҡлап торабыҙ. Мин ышанам, еңеү беҙҙеке буласаҡ. Алланан мөмкин тиклем уның тиҙерәк килеүен һәр ваҡыт һорайым, граждандарыбыҙ өйҙәренә имен-аман әйләнеп ҡайтһын, – тип теләне Владимир Боделан. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондары аша, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ.Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Валерий Шахов фотолары.