Сибай ҡалаһы йәнә Ҡытай һәм Рәсәйҙең партнерлыҡ диалогы өсөн майҙансыҡҡа әүереләсәк

Йылдың иң көтөп алынған эшлекле ваҡиғаһы - «Урал аръяғы-2024» Бөтә Рәсәй инвестиция һабантуйына тиклем бер айҙан аҙыраҡ ваҡыт ҡалды. Форум Башҡортостан Республикаһының Сибай ҡалаһында 23-25 майҙа үтә. Сит ил партнерҙары үҙҙәренең көн тәртибен планлаштыра ла инде - уға ағымдағы проекттар ҙа, киләсәккә инвестицион тәҡдимдәр ҙә ингән. - Башҡортостандың донъяның 112 иле менән ныҡлы иҡтисади бәйләнештәре бар. Әммә республиканың тышҡы сауҙа әйләнешендәге өлөшө буйынса, был 25 процентҡа яҡыны - бөгөн беҙҙең өсөн төп партнер булып Ҡытай тора. Был беҙҙе мөнәсәбәттәрҙе һаҡларға һәм яңы өлкәләр табырға бурыслы итә. Улар Башҡортостанда инвесторҙар өсөн яҡшы шарттар булдырылған үҙ бизнесын асырға теләй. Республикала биш йылдам үҫеш биләмәһе һәм федераль, республика өҫтөнлөктәре булған махсус иҡтисади зона бар. «Алға» махсус иҡтисади зонаһында таможня пошлиналарыһыҙ эшләргә мөмкинлек биргән ирекле таможня зонаһы эшләй. Быларҙың барыһы ла бизнес өсөн уңайлы шарттар булдыра, әлбиттә, - тип һыҙыҡ өҫтөнә алды Башҡортостан Премьер-министры Андрей Назаров. Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева билдәләүенсә, 2023 йылда «Урал аръяғы» инвестиция-һабантуйында Ҡытай Халыҡ Республикаһынан да ҙур делегация булды. Форумда йәмғеһе 9 дәүләт, шул иҫәптән Иран, Төркиә, Һиндостан, Белорусь һәм башҡа илдәр вәкилдәре ҡатнашты. - Ҡытай – Башҡортостандың төп партнеры. Улар менән бергәләп перспективалы проекттарҙы тормошҡа ашырыу өҫтөндә эшләйбеҙ. Инвестицияларҙың дөйөм күләме биш миллиард һум самаһы тәшкил иткән фиброцемент заводы уларҙың береһе булып тора. «Урал аръяғы-2024» артабанғы берлектәге перспективаларҙы тикшереү өсөн яҡшы майҙансыҡҡа әйләнер, тип ышанабыҙ, - тип билдәләне Маргарита Болычева. Форумға саҡырылған ҡунаҡтарҙың береһе - LS Group компанияның Рәсәй вәкиллеге етәксеһе Цзан Боян әфәнде. Ул Ҡытай һәм Рәсәй төбәктәре араһында бизнес-диалогты үҫтереү өсөн «Урал аръяғы» форумының мөһимлеген билдәләне. Ҡытай Башҡортостан менән күп яҡлы хеҙмәттәшлекте үҫтереүгә ҡыҙыҡһыныуын йәшермәй. Ҡытай делегацияһы форумға ҙур составта килергә ниәтләй. 2023 йылдың тәүге ярты йыллығында Башҡортостан менән Ҡытай араһындағы тауар әйләнеше 88% артҡан. Әлеге ваҡытта Башҡортостан Республикаһы Ҡытайҙың бер нисә провинцияһы, шул иҫәптән Аньхой, Цзянси һәм Хубэй һәм башҡа бик күп төбәктәр менән тығыҙ бәйләнеш тота. Экспорт структураһында ауыл хужалығы сеймалы, машиналар эшләү өлкәһендәге продукттар өҫтөнлөк итә. Үҙ сиратында төп импорт тауарҙарға ҡорамалдар һәм пластик изделиелар инә. Фото: Башҡортостан Хөкүмәте сайтынан