Егет һөйгән ҡыҙына арнап беҙ белгән "Мәрйәмем" йырын яҙа

Киң билдәле ретро-йырҙарҙың береһе "Мәрйәмем"дең авторының фажиғәле яҙмышы тураһында беләһегеҙме? "Мәрйәмем минең" йырын башҡарған Хәсән ағай Усманов һөйләүенсә, уның авторы - Бөрйән районынан Сабитулла Ғәйнетдин улы Хөснитдинов (1949 -1971). Бөрйән районының Һарағы ауылы егете Белорет районының Һаралы ауылынан булған, педагогия училищеһын тамамлап күрше Бәләкәй Ҡыпсаҡ ауылына эшкә килгән уҡытыусы ҡыҙ Мәрйәм Ҡаһармановаға ғашиҡ була. Ләкин йәштәр араһындағы һөйөүҙең ғүмере ҡыҫҡа була. Ошо хистәрен егет йыр юлдарына һала ла инде. Сабитулла Украинала хеҙмәт итеп ҡайтҡас, Йылайырға уҡырға китә. Унда егетте йыртҡыстарса һәләк итәләр... Социаль селтәрҙә ул осорҙағы ваҡиғаларҙың шаһиттары, Сабитулланың туғандары хәлгә асыҡлыҡ индерә. Фәрзәт Ҡаһарманов: - Был йыр минең тәүге уҡытыусым Мәрйәм Ҡаһармановаға арнала. Белорет районынан Бөрйән районының Бәләкәй Ҡыпсаҡ ауылына эшкә килгән ҡыҙға күрше ауыл егетенең күҙе төшә, тик Мәрйәм апай икенсе егеткә кейәүгә сыҡты. Шул йырҙы яҙған ябай ауыл егетенең исемен онотҡанмын, фамилияһы Хөснитдинов. Ул егетте Магнитта эшләп йөрөгән сағында, бер ҡыҙҙы яҡлашҡан сағында, сәнсеп үлтерәләр. Ә Мәрйәм апай иҫән, Белорет районында йәшәп ята...Гөлсөм Мырҙабаева: - Фәрзәт, һеҙҙең версияғыҙ дөрөҫ түгел, ағайым Сабитулла Ғәйнетдин улы Хөснитдинов Йылайырҙа ветврачҡа уҡып йөрөгәндә, урындағы масал урыҫтары ҡулынан һәләк булды. Сәбәбе - ағайымдың, актив булып, училищелағы барлыҡ кисәләрҙе алып барыуы. Ҡыҙҙарҙы ҡаратып ултыраһың, тип фатирына ҡайтып барғанда һигеҙ вәхши тарафынан йыртҡыстарса туҡмалып үлеп ҡалды... Вәсилә Заһиҙуллина-Хөснитдинова: - Эйе, һүҙҙәрен дә, көйөн дә үҙе яҙҙы, ул шул хәтлем матур итеп гармунда уйнай торғайны... Сығанаҡ һәм фото: "Башҡорт йырҙары", "Хазина" төркөмдәре, "Йәншишмә" гәзите.