"Мөрсәлим" карьерындағы хәлдәр буйынса фекер алышыу булды

Был теманы республика етәксеһе 26 апрелдә үткән кәңәшмәлә башлап телгә алғайны. Унда сит төбәктән килгән арендатор ҡырсынташ сығара һәм тирә-яҡ юлдарға зыян килтерә. Был, әлбиттә, халыҡта хаҡлы рәүештә ризаһыҙлыҡ тыуҙыра. Радий Хәбиров хәлде аныҡларға ҡушҡайны. "Ространснадзор"ҙың Волга буйы федераль округы буйынса төбәк-ара территориаль идаралығы начальнигы урынбаҫары Тимур Мөхәмәтйәнов был карьерҙа Ростов өлкәһенән килгән "Шахтинский карьер" ойошмаһы эшләгәнен еткерҙе. Көн һайын бынан 160-лаған ҙур йөк машинаһы үтә. - Тәүлегенә 8 тонна тирәһе ҡырсынташ сығарыла. Транспортҡа саманан тыш йөк тейәлгәне күренеп тора, етмәһә, махсус рөхсәт ҡағыҙҙары ла юҡ, - тине Т. Мөхәмәтйәнов. - Ҙур йөк машиналары Салауат районы юлдарына килтергән зыян 1 миллиард һумдан артығыраҡ тип баһалана. Салауат районы хакимиәте башлығы Марс Кашапов "Шахтинский карьер" ойошмаһының әйләнгән һайын ҡағиҙәләрҙе боҙоуы тураһында белдерҙе. Мәҫәлән, 10 майға тиклем ҙур йөк машиналарына йөрөү тыйылһа ла, улар һаман да ҡырсын ташыуын дауам итә. Был республика әһәмиәтендәге юлдарҙың тағы ла нығыраҡ боҙолоуына килтерә. Башҡортостан Башлығы киләһе аҙнала Салауат районында Рәсәйҙең Тәбиғәттән файҙаланыуҙы тикшереү буйынса федераль хеҙмәте, прокуратура ҡатнашлығында файҙалы ҡаҙылмалар менән файҙаланыу буйынса ведомство-ара комиссия ултырышы үткәрергә, карьерҙы арендалаусынан зыянды ҡаплатыу механизмын булдырырға ҡушты. Башҡортостандың юл хужалығы идаралығы республика юлдарына килтерелгән зыянды иҫәпләргә һәм дәғүә ғаризаһы бирергә бурыслы. "Беҙҙең алда - ауыр юл. Әммә беҙ тәбиғәт байлыҡтарын файҙаланыусыларҙы беренсе тапҡыр ғына һушына килтермәйбеҙ", - тине Радий Хәбиров. Мәғлүмәт, фото: glavarb.ru/rus/press_serv/novosti/177205.html