Республикала енси юл менән таралыусы инфекцияларҙы иҫкәртеү аҙнаһы дауам итә. Кеше папилломаһы вирустары (ВПЧ) – тире япмаһы эпителийҙарын һәм лайлалы тиресәне зарарлаусы төрлө вирустар төркөмө. Уларҙың йөҙгә яҡын төрө бар, 30-ы ҡатын-ҡыҙҙарҙың енес ағзаларын зарарлай. Сирҙең сығанағы булып ауырыу кеше йәки сир билдәләре күҙәтелмәгән хәлдә лә вирус йөрөткән кеше булыуы мөмкин. Кеше папилломаһы вирустары, нигеҙҙә, енси юл менән йоға, әммә сирле кешенең тиреһенә ҡағылғандә йәки лайлалы тиресәһенә тейгәндә лә сирҙе йоҡтороу ихтималлығы бар. Яңы тыуған сабыйҙың инфекцияны әсәһенән йоҡтороу хәүефе көслө. Таралыу тиҙлеге буйынса кеше папилломаһы вирусы енси юл менән таралыусы инфекциялар араһында беренсе урынды биләй. Өҫтәүенә ул ҡатын-ҡыҙҙарҙа кесе янбаш ағзаларындағы онкология сирҙәренең яртыһынан күбеһенең сәбәбе булып тора. Ҡайһы бер типтары балаятҡы муйынтығы яман шешен барлыҡҡа килтерә. Енси тормоштоң иртә башланыуы, партнерҙарҙы йыш алмаштырыу, аборттар, тәмәке тартыу, иммунодефицит, генетик бирешеүсәнлек – инфекцияны йоҡтороуға юл асыусы факторҙар. Сирҙе йоҡтороуҙың тәүге этабында бер ниндәй билдәләр күҙәтелмәй. Аҙаҡ ниндәй типҡа ҡарауына һәм организмдың үҙенсәлектәренә бәйле, үҙен төрлөсә тотоуы, енси ағзалар тиреһендә осло кондилома һәм һөйәлдәр барлыҡҡа килтереүе ихтимал. Сирҙе иҫкәртеү сараларына контрацепция ысулдарын ҡулланыу, акушер-гинекологтарҙа даими тикшереү үтеү инә. Шулай уҡ кеше папилломаһы вирустарына ҡаршы вакцина ҡаҙатырға мөмкин. Вакцинация прививкаларҙың Милли календарына индерелмәгән, шуға күрә Мотлаҡ медицина страховкаһы саралары иҫәбенән түләнмәй. Юғары онкология хәүефе янаған был сирҙе ир-ат та йоҡтора, инфекцияның енси ағзала яман шеш барлыҡҡа килеүенә сәбәпсе булыуы ихтимал. Фото: Һаулыҡ һаҡлау министрлығының матбуғат хеҙмәте.