30 апрелдә Шишмә районына эш сәфәре барышында Башҡортостан Башлығы Радий Хәбиров урындағы торлаҡ-коммуналь хужалыҡ предприятиелары эшмәкәрлеге менән танышты. Уларҙың береһе – «УЮТ» яуаплылығы сикләнгән йәмғиәте биләмәләрҙе төҙөкләндереү һәм йәшелләндереү, юлдарҙы төҙөкләндереү һәм ағымдағы ремонтлау, шулай уҡ сүп-сар йыйыу һәм сығарыу менән шөғөлләнә. Республика Башлығының махсус хәрби операцияла ҡатнашыусыларҙың ғаиләләрен утын менән тәьмин итеү буйынса йөкләмәһенә ярашлы предприятиела утынды механизацияланған ысул менән әҙерләү ойошторолған. Ихаталарҙы һәм скверҙарҙы йәшелләндереү йәмғиәте теплицаларҙа петуния, бәрхәт, цинерария, сальвия, бегония, зәңгәр шыршы, кизильник һәм төрлө спиреялар үҫтерә. Предприятие директоры Юнир Ҡарасурин һөйләүенсә, 2023 йылдың йәйендә «УЮТ» йәмғиәте ҡырсынташ етештереү буйынса ваҡлау комплексын һатып алған һәм монтажлаған. Эшкәртеү өсөн материалды ҙур таш ҡаялар сығарылған райондың карьерҙарының береһенән килтерәләр. Уларҙы ваҡлағандан һуң бөтә кәрәкле талаптарға яуап биргән ваҡ таш барлыҡҡа килә. Был аҡсаны күпкә экономиялай һәм юлдарҙы тәртипкә килтерергә мөмкинлек бирә – ваҡлау комплексы эшләй башлағандан алып районда 12,5 саҡрымдан ашыу юл һалынған. Юнир Ҡарасурин билдәләүенсә, үҙебеҙҙә етештерелгән бер кубометр ҡырсынташтың үҙҡиммәте – 480 һум, ә һатып алынған инерт материалдың кубометры 1 500 һумға төшә. «Шишмәэнергосервис» акционерҙар йәмғиәте составына ике производство-эксплуатация подразделениеһы инә. Ойошманың генераль директоры Альберт Ғәзиев хәбәр итеүенсә, 2023 йылда республика субсидиялары иҫәбенә селтәр хужалығын ярайһы уҡ яңыртыу мөмкин булған, был ҡышты аварияһыҙ үтергә мөмкинлек биргән. Радий Хәбировҡа шулай уҡ һыу менән тәьмин итеү һәм һыуҙы ағыҙыу, ағынты һыуҙарҙы ҡабул итеү һәм таҙартыу, һыу үткәргес һәм канализация селтәрҙәрен төҙөү, ремонтлау һәм хеҙмәтләндереү өсөн яуаплы «Шишмә һыу каналы» муниципаль унитар предприятиеһы һәм торлаҡ фондына идара итеү һәм уны файҙаланыу менән шөғөлләнгән, ағымдағы һәм капиталь ремонт буйынса эштәр башҡарған «Шишмә районының торлаҡ сервисы» йәмғите эше тураһында бәйән иткәндәр. «УЮТ йәмғиәте базаһында Башҡортостан Башлығы Шишмә районы торлаҡ-коммуналь хужалыҡ предприятиелары коллективтары менән аралашты, уларға хеҙмәте өсөн рәхмәт әйтте һәм дәүләт наградаларын тапшырҙы. Фото: glavarb.ru