Барыһы ла иғтибар үҙәгендә

30 апрелдә Шишмә ҡасабаһында Башҡортостан Башлығы Радий Хәбиров Шишмә районынан махсус хәрби операцияла һәләк булғандарҙың ғаиләләре менән осрашты. Төбәк етәксеһе хәрби хеҙмәткәрҙәрҙең ғаиләләренә ҡайғы уртаҡлашыуын белдерҙе, шулай уҡ генерал Шайморатов ордендарын Артур Йолчуев, Айҙар Ситдиҡов, Андрей Стручков, Инйәр Собханғолов, Азат Суфиянов, Алик Фәйзуллин, Александр Феоктистов һәм Дмитрий Хәлимовтың туғандарына һәм яҡындарына тапшырҙы. Яугирҙәр хәрби бурыстарҙы үтәгәндә күрһәткән батырлығы һәм ҡаһарманлығы өсөн үлгәндән һуң юғары наградаға лайыҡ булған. - Улар ысын геройҙар, һәм беҙҙең дөйөм бурысыбыҙ – улар тураһында хәтерҙе һаҡлау. Һеҙ хәрби бурысығыҙҙы үтәгәндә һәләк булған ысын ир-егеттәрҙе, патриоттарҙы, ватанды һаҡлаусыларҙы тәрбиәләгәнһегеҙ. Был парк Тыуған ил өсөн ғүмерен биргән балаларығыҙға ла бағышланған. Беҙ был майҙансыҡты әүҙем үҫтерәбеҙ, унда яңы ҡоролмалар төҙөйбөҙ, - тине Радий Хәбиров. Һәләк булған яугирҙәрҙең ата-әсәләре үҙ сиратында республика Башлығына үҙҙәренең проблемаларына шәхси иғтибар өсөн рәхмәт белдерҙе. Радий Хәбиров төбәктә хәрби хеҙмәттә ҡатнашыусыларҙың ғаиләләренә ярҙам сараларының киң исемлеге булыуын, шулай уҡ осрашыуҙа хәрбиҙәрҙең туғандары һәм яҡындары биргән һорауҙар буйынса бер нисә йөкләмә биреүен иҫкә төшөрҙө. Осрашыу алдынан Башҡортостан Башлығы «Герой Әсәһе" фотокүргәҙмәһе экспозицияһы менән дә танышты. Фотоларҙа хәрби бурысты үтәгәндә һәләк булған махсус хәрби операцияла ҡатнашыусыларҙың туғандары һәм яҡындары сағылдырылған. Шулай уҡ 30 апрелдә Шишмә ҡасабаһында Башҡортостан Башлығы Радий Хәбиров Спорт урамындағы 1-се һәм 2-се күп фатирлы йорттарҙың ихата биләмәһендә булды. Уларҙы 2023 йылда «Башҡорт ихаталары» республика программаһы сиктәрендә төҙөкләндергәндәр. Шишмә районы хакимиәте башлығы Ришат Мансуров һөйләүенсә, төҙөүселәр бында балалар һәм спорт майҙансыҡтарын йыһазландырған, тротуарҙарға һәм автотранспорт өсөн парковкаларға асфальт түшәгән, яҡтыртыу системаларын монтажлаған, бәләкәй архитектура формаларын ҡуйған. Төҙөкләндереүҙең дөйөм хаҡы 15 миллион һумдан ашыу тәшкил итә. Радий Хәбиров менән аралашҡанда халыҡ ихаталарҙы үҙгәртеп ҡороу программаһы өсөн төбәк етәкселегенә рәхмәт белдерҙе. Улар хәҙер йорттар янында өлкәндәр һәм балалар өсөн уңайлы ял итеү урыны барлыҡҡа килеүен билдәләне. Республика Башлығы йорт яны майҙансығын комплекслы ремонтлау сифатын юғары баһаланы. Шишмә ҡасабаһында республика Башлығы Еңеү паркын төҙөкләндереү барышы менән дә танышты. Муниципалитет халҡы уны «Торлаҡ һәм ҡала мөхите» милли проектының «Уңайлы ҡала мөхитен булдырыу» федераль программаһы буйынса яңыртыу өсөн тауыш бирҙе. Йәмәғәт биләмәһен тәртипкә килтереү 2020 йылда башланған. Бында йәйәүлеләр өсөн юлдар һалынған, тышҡы яҡтыртыу монтажланған, сәхнә һәм эскәмйәләр ҡуйылған. Шулай уҡ Советтар Союзы һәм Рәсәй Геройҙары, Социалистик Хеҙмәт Геройҙары постаменттары өсөн нигеҙҙәр булдырылған. Ә төп инеү урынында яңы стела барлыҡҡа килгән. Фото: glavarb.ru