Республиканың Һаулыҡ һаҡлау министрлығынан хәбәр итеүҙәренсә, ошо көндәрҙә Йылайыр үҙәк район дауаханаһына гинекологик ауырыуҙарҙы диагностикалауҙа мөһим инструменттарҙың береһе — яңы кольпоскоп килтерелгән. Район дауаханаһына заманса ҡорамал алыу “Һаулыҡ һаҡлау” милли проектының (национальный проект ”Здравоохранение”) “Беренсел звеноны модернизациялау” программаһын тормошҡа ашырыу нигеҙендә тормошҡа ашырылған. Программаның маҡсаты - медицина ярҙамы күрһәтеү мөмкинлектәрен арттырыу. Заман гинекологияһын кольпоскопиянан тыш күҙ алдына килтереү ҡыйын, ти белгестәр. Был тикшереү ысулының инвазив булмауы, ауыртыуһыҙ уҙыуы, шулай уҡ ҙур мәғлүмәтлелеге өҫтөнлөклө. Киңәйтелгән кольпоскопия ярҙамында төрлө этиологиялы шештәрҙе диагностикаларға ла мөмкин. Кольпоскопияны 30 йәштән өлкән бөтә ҡатын-ҡыҙҙың йыл һайын үтеүе фарыз. "Пациенттарҙы яңы, заманса ҡорамалдар ярҙамында тикшерәсәкбеҙ. Был бик шатлыҡлы. Хәҙер диагностиканы киңәйеү мөмкинлеге бар", - тип билдәләй Йылайыр үҙәк район дауаханаһының гинекология бүлеге акушер-гинекологы Елена Парфенова. Мәғлүм булыуынса, 2019 йылда илебеҙҙә Рәсәй Президенты Владимир Путин башланғысы менән милли проекттар, шул иҫәптән "Һаулыҡ һаҡлау" милли проекты старт алды. Ул эшкә яраҡлы йәштәге халыҡтың үлем осраҡтарын кәметеүҙе, медицина ойошмаларында кадрҙарға ҡытлыҡты бөтөрөүҙе, граждандарҙы профилактик тикшереүҙәр менән тәьмин итеүҙе күҙ уңында тота. Республикабыҙҙа был йүнәлешкә ҙур иғтибар бүленә. Тап ошо милли проект нигеҙендә Башҡортостанда медицина учреждениеларының матди-техник базаһын, халыҡты медицина хеҙмәтләндереүен яҡшыртыуға йүнәлтелгән күп пландар, проекттар тормошҡа ашырыла. Фото: Башҡортостандың Һаулыҡ һаҡлау министрлығы.