Кисә Санкт-Петербургта ҡот осҡос фажиғә булды: водителе идара итеүҙе юғалтҡан маршрут автобусы Мойка йылғаһындағы күперҙең кәртәһен емереп, пассажирҙары менән һыуға сума һәм бата. Салонда булған 20-ләп кешенән берәү ярылған тәҙрә аша үҙе сыға һәм яҡында булған сәйәхәт катерына йөҙөп бара, 10 кешене үтеп барған кешеләр һәм ҡотҡарыусылар ҡотҡара, һыу аҫтынан туғыҙ пассажирҙың кәүҙәһен водолаздар күтәрә: вафат булған өс кешене, шулай уҡ клиник үлем хәлендәге дүртәүҙе һәм ауыр хәлдәге икәүҙе. Әле рәсми мәғлүмәттәрҙән фажиғә ҡорбандарының етәүгә тиклем артыуы билдәле булды. Күрәһең, табиптар ауыр хәллеләрҙе клиник үлемдән йолоп ҡала алмаған... Ә фажиғәне күргәс тә ябай кешеләр ярҙамға ташланмаһа, ҡорбандар һаны тағы ла күберәк булыр ине, моғайын. Тәүге минуттарҙа уҡ үтеп барған машиналар туҡтап, уларҙағы ир-егеттәр (фотола уларҙың икәүһе) күпергә арҡан бәйләп, шуның буйлап шыуып төшөп, ҡыйығы ғына күренгән автобусҡа йөҙөп барып, ҡотҡарыу эшенә тотона. Автобус ҡыйығында люкты асырға маташҡан водителгә ярҙам итеп, шунда уҡ бер-бер артлы пассажирҙарҙы тартып сығара башлайҙар. Яҡындағы күперҙән һәм экскурсия теплоходтарынан халыҡ ҡотҡарыу ҡулсалары ташлай. Тәфтиш комитеты мәғлүмәттәре буйынса, 44 йәшлек водитель Рахматшох Курбонов транспортҡа идараны юғалта. Ә уның ҡатыны белдереүенсә, бер көн алда таңғы 5-тән эшкә киткән ире төнгө сәғәт 2-3-тәрҙә генә ҡайтып, тағы ла эшкә сығырға ҡушыуҙарын әйтә. Ә инде иртәнге 8-се яртыла шылтыратып уятып, уны йәһәтләп саҡыртып алдылар, ти. Ял режимын үтәмәү бәләгә сәбәпсе булғанмы, әллә башҡа шарттармы - тәфтишселәр асыҡлаясаҡ. Кисә үк бөтә тәҙрәләре ярылған, кузовы йәмшәйгән автобусты кран ярҙамында һыуҙан сығарып алдылар. Уның эсендә пассажирҙарҙың таяҡ, биштәр, телефон, асҡыс кеүек әйберҙәре лә ҡалған. Ҡаза күреүселәр - 28-71 йәшлек ҡатын-ҡыҙҙар һәм ирҙәр. Ҡайһы берәүҙәренең бәлиғ булмаған балалары етем ҡалды. Һәләк булыусыларҙың ауыр ҡайғыһын уртаҡлашабыҙ. Фото һәм видео: РФ Дәүләт Думаһы депутаты Бийсултан Хамзаев һәм "Mash на Мойке" телеграм каналы.