“Һаулыҡ һаҡлау” милли проектының тәүге звеноны яңыртыу программаһына ярашлы, йыл башында Ҡырмыҫҡалы үҙәк район дауаханаһына ике оптик кольпоскоп алынғайны.Программаның маҡсаты билдәле инде – халыҡҡа медицина ярҙамын мөмкин тиклем яҡынайтыу. Билдәле булыуынса, кольпоскоп гинекологияла ҡулланыла, асыҡлап әйткәндә, балаятҡы муйынтығы һәм еңсә сирҙәрен диагностикалау өсөн.Дауаханаға алынған ҡорамал заманса оптика менән йыһазландырылған. Ул туҡымалар структураһы һүрәттәрен ентекләп ваҡ деталдәрҙә күрһәтә һәм патологияларҙы яҡшы асыҡлай. –Яңы кольпоскоптар ярҙамында 86 тикшереү үткәрҙек. Табиптарҙың профессионаллеге һәм яңы ҡорамалдарҙың теүәллеге һөҙөмтәһендә дүрт пациенттың яман шеш башланыу алдында тороуын асыҡланыҡ, береһендә балаятҡы муйынтығының яман шешкә дусар булыуын күрҙек. Әле ауырыуҙарҙың бишеһе лә дауалана. Яңы ҡорамал килеүенә һәм диагностика сифатының яҡшырыуына шатланып бөтә алмайбыҙ, – ти Ҡырмыҫҡалы үҙәк район дауаханаһының ҡатын-ҡыҙҙар консультацияһы мөдире Винерита Саяпова. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығының матбуғат хеҙмәте.