Диктантты яҙған ваҡытта "Үҙем тураһында икән" тип, уйлап ултырҙым

Бөгөн, 27 апрель - башҡорт теленән Халыҡ-ара диктант яҙыу көнө. Был акция “Тел – халҡыбыҙҙың рухи байлығы”, “Тел – халыҡтың рухи мираҫы” девизы аҫтында үтте. Акцияла теләгән һәр кем, башҡорт телен белеү кимәленә ҡарап, диктантты онлайн йәки офлайн форматта яҙыу вариантын һайланы. Онлайн форматта акция Башҡортостан юлдаш телевидениеһында тура эфирҙа күрһәтелде. Мифтахетдин Аҡмулла исемендәге Башҡорт дәүләт педагогия университетында ла диктантты яҙыу өсөн ике майҙансыҡ ойошторолдо – башҡорт телен иркен белгәндәр һәм башҡорт телен башланғыс кимәлдә өйрәнгәндәр өсөн. Башҡорт телен иркен белгәндәр өсөн тексты – Мәжит Ғафури исемендәге Башҡорт дәүләт академия драма театры актрисаһы, Башҡортостандың халыҡ артисы Сара Буранбаева, башҡорт телен башланғыс кимәлдә белгән ҡатнашыусылар өсөн - Өфөнөң 18-се Башҡорт балалар баҡсаһы тәрбиәсеһе, “Туған телдә уҡытыу менән мәктәпкәсә белем биреү ойошмаһының йыл педагогы – 2024” республика профессиональ конкурсының абсолют еңеүсеһе Әлиә Ишдәүләтова уҡыны. Диктант яҙыу сараһы “Урал” көйө аҫтында башланды. Ҡатнашыусыларҙы Мифтахетдин Аҡмулла исемендәге Башҡорт дәүләт педагогия университетының Йәштәр сәйәсәте Һәм халыҡ ара бәйләнештәр буйынса проректоры Радик Зиннәт улы Юлбаев, билдәле сәсәниә, филология фәндәре докторы Розалия Әсфәндиәр ҡыҙы Солтангәрәева тәбрикләне. Диктант яҙыуҙа студенттар, билдәле артистар, йәмәғәт эшмәкәрҙәре, сәнғәт әһелдәре, журналистар әүҙем ҡатнашты. Максим Горький исемендәге 3-сө гимназия уҡытыусыһы Рәмзиә Һибәт ҡыҙы Яҡшыбаева сараға милли кейемдә килгән. Уның диктант буйынса фекерен һораныҡ. – Диктант тексы шул тиклем еңел булды, миңә оҡшаны. Бала саҡта башҡорт ғаиләләрендә атай-әсәй генә түгел, олатай-өләсәйҙәр ҙә йола буйынса, Ҡөръәнгә таянып балаларҙы тәрбиәләгәне, күршеләргә, өлкәндәргә хәрмәт итеп ҡарағаны тураһында булғанғамы шул ҡәҙәр оҡшаны. Ошо диктантты яҙған ваҡытта "Үҙем тураһында икән" тип уйлап ултырҙым. Мин уянғанда ла өҫтәлдә быҫҡып самауыр йырлап ултыра торғайны. Инәйем ҡоймаҡ, йылы бәрәңге менән беҙҙе уята торғайны, – тип уртаҡлашты Роза Һибәт ҡыҙы. Башҡорт телен иркен белгәндәр өсөн диктант тексы “Бала саҡтың илаһи таңдары” тип атала. Ул яҙыусы, журналист Мөнир Ҡунафиндың әҫәренән алынған. Акцияла ҡатнашыу һөҙөмтәләре, уны үткәргәндән һуң 30 көндән дә һуңға ҡалмай, диктант сайтында баҫыласаҡ https://bashdictant.ru /. Ҡатнашыусыларға сертификат бирелде. Рәмилә МУСИНА фотолары һәм видеояҙмаһы.