Башҡортостанда 2024 йылда 750 етем баланы торлаҡ менән тәьмин итеү планлаштырыла. Был маҡсатҡа федераль һәм төбәк бюджеттарынан 2,6 миллиард һум йүнәлтелә. Был хаҡта республиканың төҙөлөш һәм архитектура министры вазифаһын башҡарыусы Артём Ковшов Башҡортостан Башлығы Радий Хәбиров уҙғарған аҙналыҡ оператив кәңәшмәлә белдерҙе. 2023 йылдан алып Башҡортостанда етем балаларҙы торлаҡ менән тәьмин итеү буйынса йыйылған бурысты этаплап бөтөрөү программаһы тормошҡа ашырыла. 2030 йылға тиклем бәлиғ булыу йәшенә етеү менән бәйле тейешле хоҡуғы булған 5 000 самаһы кешене торлаҡ менән тәьмин итеү күҙаллана. Етем балаларға фатирҙар ҡуртым килешеүе буйынса бирелә. 2024 йыл башынан республика муниципалитеттары дөйөм суммаһы 560 миллион һумлыҡ 225 фатир һатып алған. Бынан тыш, 2023 йылдан республика бюджеты иҫәбенә 3,2 миллион һум күләмендә торлаҡ сертификаттары тапшырыла. Улар етем балаларға Башҡортостан биләмәһендә йәшәгән йәки эшләгән урындан торлаҡ һатып алырға мөмкинлек бирә. – Торлаҡ сертификаты менән 2023 йылда бөтәһе 80 етем бала файҙаланды, 2024-тә – 31, – тип билдәләне Артём Ковшов. – Ә быйылдан алып торлаҡты Рәсәйҙең башҡа төбәктәрендә лә һатып алырға мөмкин. Башҡортостан Башлығы Радий Хәбиров республиканың Финанс министрлығына төбәктең Төҙөлөш һәм архитектура министрлығы менән берлектә киләһе өс йылға бюджетты планлаштырғанда етем балаларҙы торлаҡ менән тәьмин итеү буйынса программаны финанслауҙы арттырыу мәсьәләһен ҡарарға ҡушты. – Был бурысты өҫтөн ҡуйғыҙ. Беҙ уны планлы рәүештә хәл итергә тейеш. Был мәсьәләлә даими хәрәкәт итергә тейеш, – тип йомғаҡ яһаны Радий Хәбиров. Фото: Башҡортостан Башлығы сайты.