Март башында республикала йәшәгән 30 йәшлек ҡатынға социаль селтәрҙәрҙә бер ир дуҫтарға өҫтәлгән. Уны-быны уйламаған гүзәл зат ир менән яҙыша башлаған. Кавалеры үҙенең икенсе төбәктә йәшәүе, төрлө илдәр буйлап йыш сәйәхәт итеүе тураһында һөйләй. Йәнәһе лә, инвестициялар менән шөғөлләнә, шуға күрә бер урынға бәйле булып ултырмай. Бер ваҡыт аралашыу яңы кимәлгә сыға: ир ҡатынға курьерҙар аша сәскәләр ебәрә башлай, танышыуға бер ай үткәс, осрашырға тәҡдим итә. Бының өсөн кавалеры янына барырға кәрәк була, тик ҡатындың аҡсаһы булмай. Шул ваҡыт “мөхәббәте” уға инвестицияларға аҡса һалырға тәҡдим итә. Унан килгән аҡсаға шулай уҡ сәйәхәт итерһең тип тә ебәрә. “Һөйгәне” менән тиҙерәк осрашырға теләгән ҡатын кредитҡа алты миллион һум аҡса ала. Ир ебәргән номерҙарға аҡсаны күсергәс тә, интернеттағы “мөхәббәте” шунда уҡ юҡҡа сыға. Мутлашыусыларға эләккәнен аңлаған ҡатын полицияға мөрәжәғәт итә. Әлегә осраҡ буйынса енәйәт эше ҡуҙғатылған. Фото: "Молодежная газета РБ".