Бүздәк районының Кәпәй-Ҡыбау ауылында алты улы Бөйөк Ватан һуғышында һәләк булған әсәй – Майкамал Латиповаға ҡуйылған стеланы күптән барып күреү хыялы бар ине. 9 Май байрамы алдынан был маҡсатҡа өлгәштек. Күңел әрнеткес был тарих тураһында ауыл биләмәһенең Ветерандар советы рәйесе, ошо ауылда 32 йыл мәктәп директоры булып эшләгән Башҡортостандың атҡаҙанған уҡытыусыһы Иршат Вәлиевтән һораштыҡ. - Майкамал Латиповаға 1947 йылда Герой-Әсә исеме бирелгән. Тормош иптәше Шакир ағай менән улар ун бала: һигеҙ ул һәм ике ҡыҙ үҫтергәндәр. Улдарының барыһы ла Бөйөк Ватан һуғышында ҡатнаша, ә алтауһы яу яландарында һәләк була. Икәүһенә генә тыуған яҡтарына әйләнеп ҡайтырға насип була. Майкамал Ғабдрахман ҡыҙына ҡуйылған стела - Герой-Әсәгә яҡташтарының ихтирам билдәһе, – тип һөйләне Иршат Ғиниәт улы. Дүрт улы 1942 йылда, икәүһе 1943 йылда һәләк булған әсәй кисергән ҡара ҡайғыларҙың йән әрнетҡес булыуын әсәй булған кеше генә аңлайҙыр. Герой-Әсә үҙе 1953 йылда 75 йәшендә яҡты донъя менән хушлаша, әммә ауылдаштарының хәтерендә ул бөгөн дә йәшәй. Был стела мәктәп алдында ғына урынлашҡан. Шуға ул һәр ваҡыт тәрбиәле, төрлө патриотик саралар ҙа бында үткәрелеп тора. Мәктәп эргәһендә тағы ла бер изге урын бар. Ошо ауылдан сыҡҡан яугир, Дан ордендарының тулы кавалеры, Социалистик Хеҙмәт Геройы Хәтмулла Солтановҡа һәйкәл. Быйыл июлдә уның тыуыуына 100 йыл тула. Яҡташтары был ваҡиғаға ентекле әҙерләнә. Ғөмүмән, Кәпәй-Ҡыбауҙан Бөйөк Ватан һуғышына 354 ир-егет китә, уларҙың 232-һе яуҙа һәләк була, 122-һе иҫән-һау тыуған яҡтарына ҡайта. Ауыл уртаһында урынлашҡан обелискта уларҙың исем-шәрифтәре уйылып яҙылған. Ваҡыт үтһә лә, Еңеү һалдаттарының батырлығы тураһында тере хәтер быуындан быуынға күсеп һаҡлана. Автор фотолары.