Өфөлә Республика балалар онкологияһы һәм гематологияһы үҙәге асылыуы төбәктән ситкә сыҡмайынса юғары технологиялы ярҙам алырға мөмкинлек бирәсәк, тип белдерҙе һаулыҡ һаҡлау министры Айрат Рәхмәтуллин. Үҙәк “Һаулыҡ һаҡлау” милли проектына ярашлы төҙөлгән. Проект хаҡы дүрт миллиард һум тәшкил итте, был сумманың 1,5 миллиард һумы федераль бюджеттан бүленде, 2,5 миллиард һумы – республика бюджетынан. Һаулыҡ һаҡлау министры яңы үҙәк буйынса матбуғат туры үткәреп, иң алдынғы лабораторияларҙы, операция бүләмәләрен, реанимация бүлексәһен һәм уңайлы палаталарҙы күрһәтте. – Заманса йыһазландырылған комплекс 92 койкаға иҫәпләнгән. Беҙ бында 37 әмәлиәт, 150-нән ашыу аҙ тишемле манипуляция эшләнек. Яңы технологиялар индереүҙе дауам итәбеҙ, уларҙың исемлеген киңәйтәбеҙ. Киләһе аҙым – елек майын күсереп ултыртыу. Тәүге операцияларҙы йәйгә планлаштырабыҙ, – тип билдәләне Айрат Рәхмәтуллин. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһының маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Олег Яровиков фотоһы.