Մի գեղեցիկ օր կմիացնեք հեռուստացույցը (հուսանք, որ հովհարային ազատումների հերթակարգը այդ ժամին բարենպաստ կլինի ձեզ համար) և կտեսնեք մի նոր ու զարմանալի հանդիսանք կամ, ինչպես հիմա են ասում՝ շոու: Վերնագիրը, անշուշտ, ինչ-որ բան կհիշեցնի ձեզ, բայց մի մոռացեք, որ հայկական հեռուստատեսությունը երբեք չի կրկնում Օստանկինոյի ձեռագիրը, ուստի ամեն ինչ կլինի շատ ինքնատիպ:
Խաղին կարող են մասնակցել բոլորը, բայց նախապես մի քանի քննություններ պիտի հանձնեն: Փակ աչքերով ու փակ բերանով (առանց շոշափելու) նրանք պետք է որոշեն, թե ինչ կերակրատեսակներ են շարված կլոր սեղանին և արագ հաշվեն,
թե մի ափսե տոլման որքան գումար է նստել եփողի վրա: Բացի դրանից,
կտրվեն հարցեր, որոնց պետք է պատասխանել ոչ ուշ, քան 60 վայրկյանի ընթացքում, օրինակ՝ ի՞նչ էր եփում Չարլի Չապլինի անմոռանալի հերոսը Ալյասկայի ցրտաշունչ երկնքի տակ (պատասխան՝ հնամաշ կոշիկ)։
Եթե հաղթահարեք այս քննակարգը, կհրավիրվեք ուղիղ եթեր և կդառնաք հեռուստախաղի մասնակից: Շահումները երկու տեսակի են՝ ցուցափեղկային և ոչ ցուցափեղկային: Առաջիններին կարելի է միայն նայել, երկրորդները՝ տանել տուն: Օրինակ՝ լավաշը ցուցափեղկային շահում է (փոքրիկ ընթերցողներին բացատրեմ, որ դա հացի ազգային տեսակ է և ժամանակին շատ տարածված է եղել Հայաստանում): Իսկ ոչ ցուցափեղկային շահումներից է, օրինակ, հացի լրացուցիչ կտրոնը:
Երբ սև սնդուկը հանդիսավորությամբ բերեն ու սկսեն սակարկել ձեզ հետ, նկատի առեք, որ սնդուկի մեջ կարոդ է լինել սուրճ կամ թթվասեր: Իհարկե, եթե դուք շահել եք
որոշ քանակությամբ սննդամթերք, ապա ձեր ազգականները, հարևանները գուցե սկսեն հաճախակի այցելել ձեզ, իսկ ձեր թաղամասի առաջին դասարանցիները կարող են էքսկուրսիայի գալ, ինչպես պատմական թանգարան կայցելեին: Ուստի տպավորությունների մատյան պահեք՝ թող ապագա սերունդներին հիշատակ մնա:
Բուն խաղը երեք փուլից՝ վերջնագծից և «սուպեր-մրցախաղից» է բաղկացած: Յուրաքանչյուր փուլ ֆինանսավորում և մրցանակներ է հատկացնում այս կամ այն թաղամասի ՍԵՂԱՆԻԿՆԵՐԻ ասոցիացիայի նախագահությունը, իսկ «սուպերի» ֆինանսավորողը «Երևան-Համբուրգ (եր)» միջազգային ընկերությունն է, որն իբրև հաղթական շահում տրամադրել է մի տակառիկ բենզին, 4 x 50 գրամանոց համբուրգեր, նավթի վառարան, մոմերի եռամսյակային պաշար: Չկարծեք, թե այս ամենը իրար հետ եք շահելու: Խոսքը դրանցից մեկի մասին է՝ պտտվող սլաքը որին որ դեմ առնի:
Բացի մասնակիցներից, ստուդիայում կլինեն հյուրեր, որոնց կկապեն իրենց նստած տեղերում, իսկ խաղասեղանն ու հանդիսատեսը բաժանված կլինեն ցանցով:
Ռեկլամային պաուզանե՞ր: Այո՛, իհարկե, ճաշակեցեք «Մարս» շոկոլադ: Բայց ո՞ւմ է հասցեագրված: Նրանք, ովքեր ռեկլամային հոլովակը տեսնելով ճաշակել կուզենան, գնել չեն կարող, իսկ նրանք, ովքեր կարող են գնել, ճաշակում են առանց հեռուստատեսային հիշեցման:
՛՛Առագաստ՛՛ թերթ , Երևան