Արտիստ Արմեն Մուրադյան - Երևանյան աստղագուշակ

Նոյեմբեր ամիսը Կենդանակերպի բոլոր նշանների տակ ծնվածներին պարգևելու է և՛ հաճելի, և՛ (դժբախ­տաբար) տհաճ պահեր:

Մորակների և աստղաբույլերի աննախադեպ դասավորության շնորհիվ նշան­ների ամբողջ համա­կարգը շարվելու է կտրոնավորված հացի հերթերում, բայց ո՛չ տիե­զե­­րական գեղեցիկ հաջորդականու­թյամբ, այլ՝ դրա զուտ երևանյան դրսևորումներով: Այլ խոսքով ասած, ամենևին պարտադիր չէ, որ հերթի մեջ Խոյն առաջինը լինի, իսկ Այ­ծեղջյուրը՝ տասներկուերորդը: Կա­րող է լրիվ հակառակը պատահել: Այնուամե­նայ­նիվ, ավելորդ վեճերից ու բախումներից խուսափելու հա­մար խորհուրդ ենք տալիս տեղն ու տեղը ճշտել ձեր հերթակից անձի նշանը: Այսպես օրինակ, եթե դուք Առյուծ եք, իսկ նա՝ Աղեղնավոր, ուրեմն ձեր հերթակցությունը բախ­տավոր է ու ներդաշնակ: Բայց աստ­ված ոչ անի, եթե դուք Ցուլի տա­րում եք ծնվել, իսկ նա՝ Վագրի: Դա հույժ անհամատեղելի հերթակալու­թյուն է, և ձեզանից մեկն անմիջա­պես պետք է նորից հերթ կանգնի: Զիջողն այս դեպքում Վագրն է, և լավ կլինի, եթե նա տեղ գրավի Վի­շապի տարում ծնվածի կողքին:

Այնուհետև, նրանք, ովքեր Հորթ են, շատ ավելի մեծ հավանակա­նությամբ են ենթակա գազամատա­կարարման խափանումների: Իսկ Կարիճների ու Զրհոսների լույսերի շախմատային գրաֆիկը կարող է բարենպաստ լինել՝ երեկոյան ժա­մերին նրանք ավելի մեծ հավանա­կանություն կունենան Մարիաննայի արցունքները անվեր­ջորեն հաշվելու։ Բայց թող նրանք չուրախանան, քանզի նոյեմբերի երկրորդ կեսին ջուր չեն ունենալու: Ինչ վերաբեբում է Երկվորյակներին ու Կշեռք­ներին, ապա նրանց համար խիստ անհրաժեշտ են սպորտային վարժու­թյունները, մանավանդ թևերի մկան­ները կոփելու նպատակով, քանզի հենց նրանք են ամենից շատ կախ­վելու ավտոբուսների դռներից կամ տրամվայների ետնասանդուղքներից:

Նոյեմբերի երկրորդ շաբաթում բոլոր նշանների համար անխտիր կսկսեն անհետանալ ալյուրը, միսը, ձուն, պանիրը, սխտորը, շոկոլադեղենը, սուրճը և այլն: Ավելի ճիշտ, դրանք կլինեն սեղանիկներին ու շուկաներում, բայց ոչ մարդկանց սառ­նարաններում ու պահարաննե­րում, որովհետև վերջիններիս մոտ խիստ կպակասի կրկնապատկված աշխատավարձը: Իհարկե, կյանքն առանց բացառությունների չի լինում և կհանդիպեն որոշ Կապիկներ, որոնք այդ ամենից կշարունակեն օգտվել նախկին առատությամբ: Թող նրանք չզարմանան, որ մանա­վանդ Առյուծները և Կույսերը իրենց ավելի վատ են զգում: Չմոռանանք, որ առայժմ Կապիկի տարի է, և բախտը ժպտում է նրանց, ովքեր ճարպիկ են ու ժամանակին կարո­ղանում են ճյուղից ճյուղ թռչել:

Ձկները ու Խեցգետինները նոյեմ­բերի վերջին երեկոները թող տանը մնան, բայց խնայեն էլեկտրականու­թյունը, որպեսզի հետո, դեկտեմբե­րի 31-ին, լիուլի լույս ունե­նան: Իսկ եթե ըստ մասնագիտությունների ու խավերի գուշակելու լինենք, ապա բիզնեսմենների համար լավ է Սատուրնի ու Յուպիտերի սպասվելիք մերձեցումը, որն էլ, սակայն, վատ է ուսանողների համար, քանի որ թանկանում է տրանսպորտային եր­թևեկությունը: Բայց շատ վատի դեպ­քում միշտ լավի հերթն էլ է գալիս, ուստի ուսա­նողները պարզապես չեն վճարի տրոլեյբուսի պոչից հերոսա­բար կառչելու արժեքը:

Միով բանիվ, Նոյեմբերը թող ձեզ շատ չհուսահատեցնի, որովհետև, եթե շատ եք վհատվել, գնեցեք ակնթարթային վիճակախաղ և քե­րելու պահին, անշուշտ, հույսի շող կճառագի ձեր սրտում: Իսկ կշահեք թե ոչ, դա արդեն երկրորդական է, քանզի ձեզ կմխիթարի «Այո՛» հեռուստաշոուի զրնգուն «Օքեյը», որն այդքան հրճվանքով ասում է «Ֆրոնտ-Սանդինայի» հեղափոխականի արտաքինով ժպտերես մի երիտա­սարդ: